Media
Cənubi Koreyada hər il təxminən 1 milyon itin it əti istehlakı üçün öldürüldüyü təxmin edilsə də, son illərdə xüsusilə gənclər arasında it ətinə tələbat əhəmiyyətli dərəcədə azalıb.
Medianews.az xəbər verir ki, Cənubi Koreya prezidenti Yoon Suk Yeolun həyat yoldaşı, birinci xanım Kim Keon Hee Cənubi Koreya mətbuatına açıqlamasında it ətinin istehlakını tənqid edib. Cənubi Koreya və Çinin hazırda insanların it ətindən istifadə etdiyi yeganə ölkə olduğunu ifadə edən Kim, “İt ətini yeməmək son nəticədə insanın ən yaxşı dostuna hörmət ifadəsidir, həm də həyata hörmət deməkdir” deyə bildirib.
Cənubi Koreyanın inkişaf etmiş ölkələr arasında “heyvanları qoruyan ən zəif qanunlara” sahib olduğundan şikayət edən Kim, heyvanlara təcavüz edənlərin cəzalandırılmasını istəyib.
“Ölkəmizdə təxminən 15 milyon insanın ev heyvanı var. İnanıram ki, sui-istifadə edənlərə qarşı cəzaları gücləndirməklə asayiş bərpa olunarsa, biz yetkin cəmiyyətə çevrilə bilərik. Axı heyvanlara qarşı zorakılıq və məişət zorakılığı eyni kökün fərqli qollarıdır”,-deyə o, qeyd edib.
Qeyd edək ki, Cənubi Koreya prezidenti Yoon daha əvvəl seçki kampaniyasında heyvanlara qarşı cəzaların artırılacağını və it ətinin istehlakının qadağan edilməsinə çalışacağını bildirmişdi.
Leyla, Medianews.az
