Media
İrəvanda səfərdə olan Rusiyanın xarici işlər naziri Sergey Lavrov erməni həmkarı Ararat Mirzoyanla keçirdiyi görüşün yekunlarına dair keçirilən mətbuat konfransında bildirib ki, Rusiya hərbçiləri Qarabağda Fərrux yaşayış məntəqəsi ətrafında vəziyyəti prioritet olaraq nəzərdən keçirir. O deyib ki, bu vəziyyətin deeskalasiyası baxımından “yerdə” müəyyən nəticələr var. Bizdə anlayış var ki, delimitasiya ilə bağlı artıq başlayan predmetli iş çərçivəsində bu məsələlərə baxılacaq və mütləq həll olunacaq.
Mövzu barədə Medianews.az-a danışan Milli Məclisin deputatı Elman Məmmədov dedi ki, Lavrov öz ağzı ilə etiraf etdi ki, rusların işi erməniləri müdafiə etməkdir:
“Bununla əlaqədar Azərbaycan Respublikasının Xarici İşlər Nazirliyi də fikir bildirdi, Rusiya Xarici İşlər Nazirliyi də Lavrovun o dediklərinə düzəliş verdi. Ancaq məsələ ondan ibarətdir ki, Lavrov dediyini dedi. Yəni sonradan düzəliş etmək və s. bu sonrakı işdir. Lavrov fikrində, ürəyində nə var idisə, onu dilinə gətirdi. Yəni buradan nə nəticə çıxarmaq olar? Sülhməramlı adlandırılan kontingent bizim ərazimizə gələn gündən – 10 noyabr 2020-ci il razılaşmasında onların üzərinə hansı vəzifə düşürsə, onun hamısını bir kənara qoyub sülhməramlılıq yox, erməniməramlılıq ilə məşğul olmağa başladılar. Bunlar bizim ərazimizə gəldiyi gündən Azərbaycan ərazisində kök salmış seperatçıları, cinayətkarları, terrorçuları müdafiə və himayə etməklə məşğul oldular. Lavrov da elə çaşıb düzünü dedi ki, onların işi oradakı erməniləri müdafiə etməkdir”.
Millət vəkili bildirdi ki, Fərrux Azərbaycan ərazisidir:
“Azərbaycanın ərazisində Xocalı rayonunun kəndlərindən biridir. Ermənistanda bu məsələnin danışılması və yaxud sərhədlərin delimitasiya, demarkasiyası məsələsində Fərruxun adının çəkilməsi ya Lavrovun məlumatsızlığı, ya da savadsızlığıdır. Ancaq belə fikirləşsək, səhv edərik. Lavrov nə məlumatsız, nə də savadsız deyil. Ancaq ürəyindən keçənlər odur ki, elə oradakı seperatçı qurum bir statusa malik olsun və Fərrux da elə onların tabeliyində olsun. Lavrov və eyni zamanda, digər ermənilər də bir şeyi bilməlidilər ki, Fərrux da, bütün Xocalı, Xocavənd rayonu da, Xankəndi də tezliklə seperatçılardan, terrorçulardan, cinayətkarlardan təmizlənəcək. O yerlərin, torpaqların, ərazilərin, yaşayış məntəqələrinin əsl sahibləri olan bizlər doğma yurd-yuvamıza qayıdacağıq. Bunu onlar istəsə də, istəməsə də edəcəyik. Bu, birmənalıdır”.
Elman Məmmədovun sözlərinə görə, Azərbaycan tərəfi birmənalı olaraq qarşı tərəfə daim öz fikrini açıq deyib: “O ərazilər Azərbaycan ərazisidir. Sərhədlərin müəyyənləşməsi, dəqiqləşməsi ilə bu ərazilərin heç bir əlaqəsi yoxdur. Azərbaycan tərəfi bu ərazilərinin kiçik hissəsində 30 ildən artıqdır fəaliyyət göstərən seperatçı, Arsax adlanan cinayətkar qurumu da ərazisindən təmizləyəcək. Ermənistan dövlətinə məxsus hərbi birləşmələrin tör-töküntülərini də təmizləyəcək. Bunu həmin Rusiya hərbi kontingenti Azərbaycan ərazisinə daxil olduğu gündən etməli idi. Ancaq əksinə, onları müdafiə etməklə, qoruyub saxlamaqla məşğul oldu. Ona görə də Azərbaycan özü o 44 günlük müharibədə olduğu kimi, yenidən anti-terror əməliyyatları keçirib, ərazisini bu seperatçılardan, cinayətkarlardan, düşmənlərdən tamamilə təmizləyəcək”.
Zərif Ülvizadə
Medianews.az
