Media
Saytlardan, sosial şəbəkələrdən qaramat tökülür. Xəbərlər elədir ki, ən nikbin adamı belə depressiyaya sala bilər – eyzən qanqaraçılıq, teyxa bədnibətlik…
Avropada, Qazaxıstanda qazın qiyməti artıb, Azərbaycanda unun, Türkiyədə hər şeyin. Dünyanın yerdə qalan ölkələrinin də hamısında nələrinsə qiyməti qalxıb, insanlar pəjmürdə və əndişəli, əsəbi və gərgindir.
Bəşəriyyətin gələcəyi yaxşı görünmür. Ekoloji fəlakətlər bir-birini əvəz edir, lokal müharibələr artır, qaçqın-köçkün axını dünyanı basır, aclıq, kasıbçılıq tüğyan edir, ən firavan ölkələr belə iqtisadi böhrana qədəm qoyurlar.
Belə baxanda yeganə xoşbəxt və nikbin ölkə, deyəsən, Hindistandır. Təxminən 1 milyard kasıbı olan ölkə 3-4 ilə əhalisinin sayına görə dünya birincisi olacaq. İnduslar kasıbçılıq, aclıq bilmədən gecəbə-gündüz çalışır, ölkələrinin və dünyanın kasıblarının sayını artırırlar. Bir ağsaqqalları da yoxdur ki, qabağa çıxıb desin ki, bəsdirin, dinc durun, saxlaya biləcəyiniz qədər uşaq əkin, nə xəbərdir.
Qazaxıstandan gələn xəbərlər də ürəkaçan deyil. Qazaxlar müdrik və savadlı, sakit və mülayim, üstəlik, yeyib-içən camaatdır, hələm-hələm ortalığa çıxıb demaqoqluq eləməzlər, amma üzləri çönüb artıq. İndi görün, hökumətin qərarları qazaxların incə damarına necə yoğun iynə olubsa, meydana yeriyiblər, deyirlər, xvatit uje. Beləcə də deyirlər, rus dilində. Prezident Tokayev də onlara rusca deyib ki, ladno, razoydites, vse budet v poryadke (yəni “anlaşıldı, dağılışın, hər şey qaydasında olacaq”).
Odur, ermənilər 1 il 2 ay 44 gündür meydandan yığılmırlar, amma əllərindən bir iş gəlmir, hökuməti aşıra bilmirlər. Qazaxlar isə bir həmləylə hökumətin istefasına nail oldular. İntəhası, bu ona oxşayır ki, hansısa nəqliyyat şirkətinin rəhbərliyinin qiymət siyasətinə etiraz edəsən, şirkət də tutub iki sürücünü işdən çıxarda ki, problem həll olundu.
Bizdə hələlik çörəyin qiymətinin dəyişməsinə görə bir balaca giley-güzar var, amma, maşallah, artıq oxumuş adamlar sübut edirlər ki, düzü budur, belə olmalıdır, çünki bu, qlobal prosesdir, qonşudan dala qalmaq olmaz, iqtisadi inkişaf templəri və beynəlxalq iqtisad böhran tendensiyasi tələb edir ki, nə bilim, nə… Qəliz məsələdir. Belə məsləhətdir.
İndi bəzi dostlar iddia edirlər ki, qazın, işığın, suyun, yanacağın, ispanağın, şüyüdün qiymətinə baxmayın, çörəyin qiyməti ilə oynamağın axırı pis ola bilər. Onlar da haqlıdır. Çörəklə bağlı xof yüz illərdir insanların canındadır, genə, iliyə işləyib. Hər şey bol və müftə olsun, heç kəsin eyninə olmaz, bircə dənə çörək baha olsun, bu coğrafiyanın adamları təlaşlanacaq. Psixoloji məsələdir, bir azca da sosioloji.
Öz ölkəmizin kriminogen durumuna dair xəbərlər isə daha məyusedicidir. Baltayla qətl xəbərləri gəlir: “Bakıda kişi arvadını balta ilə öldürüb”; Astarada qardaş bacıları tərəfindən baltalanıb; “Azərbaycanda qadın ərini yataqda baltalayaraq öldürüb”.
Göründüyü kimi, baltayla cinayət işləmək xüsusunda ümumi hesab qadınların xeyrinə 2:1-dir. Bu, yeni tendensiyadır. Hərçənd ilk presedent deyil. Keçən il də qadınlar baltayla kişilərə nisbətən daha çevik tərpənmişdilər, hesabda önə çıxmasalar da, müəyyən nailiyyətlər əldə etmişdilər. Bu il isə açıq-aşkar öndədirlər. Belə getsə, aradakı fərqi aça bilərlər.
Əlbəttə ki, günah kişilərdədir. Yüyürən at özünə balta vurdurmaz. Ona görə də kişilər meydana tökülüb “kişi qətlləri siyasidir”, “hökumət hara baxır” deyə demaqoqluq edə bilməzlər.
Qoy heç kəs unutmasın ki, hər hozu kişinin arxasında bir əlibaltalı qadın dayanır.
Yox, elə çıxmasın ki, müəllif kişilərin baltalanmasına haqq qazandırır. Elə deyil. Hələ detalları bilmirik. Bildiyimiz odur ki, qadınlar dünyasında məcbur olmadıqca baltaya, bıçağa əl atmazlar. O bəzi kişilərdir, bəzən arvadlarını sırf zövq üçün döyürlər. Qadınlar isə kişini zövq üçün baltalamırlar – burası yüzdəyüzdür.
Ola bilər, burada 2022-ci ilin təhvil olduğu Zodiak bürcünün də təsiri var. İl Pələng ilidir. Bildiyimiz kimi, Pələngin (aslanın) erkəyi-dişisi olmaz. Belə anlaşılır ki, əslində bu il əlibaltalı dişi aslan ilidir. Ehtiyatlı olmaq lazımdır, hər dəqiqə aslana cavab qaytarmamaq şərtdir. Bu, başın (xüsusilə də boyun nahiyəsinin) salamatlığı üçün çox vacibdir.
