Media
Tanrı videoregistratoru icad edən kişinin atasına rəhmət eləsin, çox vacib iş görüb.
Əslində mobil telefonlara videokamera quraşdıranların da atasına rəhmət düşür, amma bəzən telefonlarla şantaj məqsədli çəkilişlər edilir deyə, bu xüsusda “nəhlət” oxuyanlarla rəhmət diləyənlərin arasında balans var, 50:50-yədir.
Avtomobillərin alın şüşəsinə içəridən yapışdırılmş videoregistrator isə hər şeyi qərəzsiz, operativ və obyektiv şəkildə çəkir, yollarda baş verən hadisələri güzgü kimi göstərir.
İndiki gənclər bilməz, 7-8 il qabaq bir əməkdaşımızın döyülməsini məhz videoregistrator qeydə almışdı. Əhvalat belə olmuşdu: əməkdaşımız kirayədə qaldığı evin qarşısında saxladığı avtomobilini işə salandan bir-iki dəqiqə sonra idmançı görkəmli, cantaraq bir gədə onu nəsə soruşmaq adıyla çağırır. Əməkdaşımız maşından düşüb ona yaxınlaşır və gözləmədiyi halda həmin o medal üzünə həsrət, amma bir neçə fənd bilən yarımçıq idmançı bunu qaldırıb yerə çırpır, təpikləyir və hadisə yerindən qaçır. Adamın ağlına da gəlmir ki, maşının videoregistratoru hər şeyi necə var, qeydə alır.
Vallahi, o lentlər olmasaydı, bu işin üstü ört-basdır ediləcəkdi. Şahid yox, bir şey yox. Deyəcəkdilər ki, naməlum şəxs tərəfindən döyülüb. Hamı da elə biləcəkdi ki, dava qız üstündə olub. Düzdür, sonuncu versiyanı dilə gətirənlər tapılmışdı, amma yerimədi. Çünki videoregistratorun qeydə aldığı kadrlar yayılandan sonra hüquq-mühafizə orqanlar kəlpeysər idmançını yaxaladılar, basdılar içəri. O da söhbəti qız üstünə fırlatmaq istəyəndə məlum oldu ki, adamın qız qohumlarıyla əməkdaşımızın yaxından, uzaqdan heç bir əlaqəsi olmayıb. Nəticədə adamı yazıq günə qoydular…
Yəni daşdan keçən videokadrlar prosesin məcrasını dəyişdi.
İndi elə çıxmasın ki, müəllif burada videregistrator reklamı aparır. Xeyr. Bugünlərdə videokadr lentə alan cihazların necə faydalı olması bir daha təsdiqləndi.
Qarşı yola çıxan və hərəkət axınının əksinə irəliləyən avtomobil sürücüsünün – gənc oğlanın ona irad tutan başqa sürücüyə gər-gər, təşər-təşər “yaxşı edirəm” dediyi videokadrları görmüsüz yəqin. O kadrların yayılmasından sonra adamı tutub 100 manat cərimə ediblər, passivinə də 4 bal yazıblar. Amma o kadrlar olmasa, ona kim nə deyəcəkdi? Heç kim. Tutulmayan oğru, xandan, bəydən doğru.
Belələri şəhərin küçələrində qarışqa kimi qaynaşır, hər 5-6 saniyədən bir qanun-qayda gözləyən sürücülərin önünə çıxırlar. Bəziləri hətta stasionar kameraların “gözü önündə” qaydaları pozur, şütüyüb gedirlər. O kameraların da dili yox, ağzı yox, gedib kiməsə şikayət eləmirlər, bəd ayaqda avtoxuliqanlar onlara baxan adamlarla da dil tapa bilirlər. Amma şikayət edən, bu videokadrları ictimailəşdirən olanda heç kəs işin içindən sıyrıla bilmir, layiq olduğu cəzanı yeyir, qazı, köpü alınır.
Dediyim odur ki, yol hərəkətinin qayda-qanun sevən iştirakçıları videoişverənlik işini inkişaf etdirməlidirlər. Çoxunun avtomobilində video qeyd edən cihazlar var, o cihazlardan səmərəli, ictimai mənafeyə uyğun şəkildə istifadə etmək, qeydə alınmış qayda pozuntularını lazımi orqanlara vaxtında çatdırmaq, arxasında durmaq lazımdır.
Bu, ümumi işə çox fayda verər. Hərəmiz bir avtoxuliqanı, harın, qudurğan sürücünü ifşa eləsək, yollarda ölümsaçan manevrlər edən, süpürgəçiləri, yol keçənləri vurub aşıran sürücülərin sayı azalar. Elə sürətli yolların icazə verilməyən yerlərində yolu qaçaraq keçməyə çalışan piyadalar da özlərini videolarda görəndən sonra özlərinə yığışarlar.
Avropa ölkələrindən danışanda həsəd apara-apara ordakı qayda-qanuna necə dəqiq riayət edilməsindən bəhs edirik ha, bax, onlar bir-birinin neqativ hərəkətlərindən şikayət edə-edə bu duruma gəliblər. Heç nəyə göz yummurlar. Şikayətçi qonşunun əlindən heç kəs evdə arvadını ürəyi istəyən kimi çırpa bilmir. Dərhal bir zəng, polis qapıdadır. Yollarda da eləcə.
Yoxsa bizdə ümumi işlərdən ötrü ora-bura şikayət edənlərin üstünə “işverən” adı qoyurlar. Son nəticədə xroniki qayda pozucusu cəzasız qalır və bir gün gəlib ondan “iş verməyən”in belindən keçir.
