"Bütün cavanlara, ümidini kəsən insanlara mesajım olsun. Hamımız müsəlmanıq, Allahı sevir, ona inanırıq. Quranda gözəl bir ayə var: ümidini Allahdan kəsənlər kafirlərdir. Heç vaxt ümidinizi kəsməyin, həmişə sevinin, əziyyətli də olsa. Deyirlər ki, əzizim dünyasını dəyişibsə, necə sevinim? Orada bir hikmət var, çünki bir gün sən də onun arxasınca gedəcəksən. O, sənin üçün örnəkdir".
Medianews.az-ın məlumatına görə, bu sözləri Xalq artisti Natiq Şirinov "Yaşananlar" verilişində deyib. O, səhnədə dünyasını dəyişəcəyi təqdirdə konsertinin yarımçıq saxlanılmamasını vəsiyyət etdiyini açıqlayıb:
"Oğluma demişəm ki, ola bilər səhnədə dünyamı dəyişərəm, konserti davam elə. Kövrəlir. Deyirəm ki, yadında saxla, biz Allahın sevimli bəndələrindənik. Güclü olmaq pullu olmaq, yaxşı maşınının, evinin olması deyil. Bu, ruhən olur. Elə həmin anda konserti davam etdirmək gücdür.
Mənim atam dünyasını dəyişməzdən əvvəl vəziyyəti çox pis idi. Həmin vaxtlarda Alim Qasımovun konsertinə məşqlər gedirdi, mən onları saxlamadım. İndiki nəslin bəzi nümayəndələri çox acizdirlər. İnsan şor çörək də yeyər, yer də süpürər, zibil də daşıyar. Əsas odur ki, yaşayırsan, evə çörək aparırsan. Bu özü həyatdır.
Hər şey Allahın əlindədir. Bu gün sahib olduqlarımı bir anda əlimdən alsa, yenə üzüm gülər. Ümidinizi kəsməyin. Əsas odur ki, gördüyün işi düzgün edəsən. Vətən, ailə və iş - bu üç şeyə sadiq olasan".
N.Şirinov gələcəkdə oğul nəvəsi olarsa, onun sənətini davam etdirməsini arzuladığını bildirib:
"İnşallah, oğlan nəvəm olsa, adını Natiq qoyacağam. O da nağara çalacaq. Bu, onun irsidir. Heç kim məndən inciməsin, bunu məndən sonra oğlum, ondan da sonra nəvəm davam etdirə bilər. Oğluma niyə nağaranı səndən çox istəyirəm, ona görə demişəm ki, bir dəfə onu vursam, polis çağırıb tutdurarlar, amma 50 ildir bu alətə vururam, üzümə qayıtmır. Ona görə o mənə daha doğmadır. Təbii ki, bu zarafatdır, amma burada həqiqət də var".
