Alimlər təsdiqlədi: Bizi kökəldən əsas qida bu imiş

Hətta qida rasionunun ümumi kalori miqdarı dəyişməsə belə, bəzi məhsullar bədən çəkisinin sürətlə artmasına birbaşa təsir göstərir. Yapon mütəxəssislər müəyyən ediblər ki, gündəlik qidalanmada çörəyin payının çox olması piylənmə riskini ciddi şəkildə artırır.

Demokrat.az xəbər verir ki, Osaka Şəhər Universitetinin alimləri çörək istehlakının orqanizmdə piy toxumasının artmasına səbəb olduğunu üzə çıxarıblar. "Molecular Nutrition & Food Research" jurnalında dərc olunan araşdırmaya görə, əsas məsələ çox yemək deyil, qidanın metabolizmə təsiridir. Siçanlar üzərində aparılan sınaqlarda standart yemlərlə yanaşı, tərkibi çörək, buğda və düyü unu ilə zənginləşdirilmiş rasionlar müqayisə edilib. Məlum olub ki, eyni miqdarda kalori qəbul etmələrinə baxmayaraq, un məmulatları ilə bəslənən heyvanlar daha çox çəki yığıblar.

Analizlər göstərib ki, "çörək pəhrizi" zamanı orqanizmdə enerji sərfiyyatı azalır və bədən daxil olan maddələri birbaşa ehtiyat piy qatına çevirməyə başlayır. Tədqiqatçılar bu prosesin genetik səviyyədə baş verdiyini bildirirlər. Belə ki, un məmulatları karbohidratların yağa çevrilməsinə cavabdeh olan genləri aktivləşdirir. Heyvanlar normal qidalanma rejiminə qayıtdıqda isə bu mənfi dəyişikliklər aradan qalxıb.

Alimlər hələlik bu nəticələrin insanlar üzərində tam eyni effekti verəcəyini iddia etməkdən çəkinirlər. Lakin əldə olunan faktlar "hər bir kalori eynidir" yanaşmasının yanlış olduğunu bir daha sübut edir. Hazırda mütəxəssislər müxtəlif növ karbohidratların, xüsusən də tam taxıllı məhsulların maddələr mübadiləsinə təsirini öyrənməyə davam edirlər. Bu cür tədqiqatların gələcədə daha dəqiq pəhriz tövsiyələrinin hazırlanmasına kömək edəcəyi gözlənilir.

Yəni, çörək və un məmulatları orqanizmdə enerjinin yandırılmasını zəiflədir və kalori miqdarı az olsa belə, bədənin piy yığmasına şərait yaradır.