Hazırda ilin ən rəngarəng meyvələrinin olduğu fəsili yaşayırıq. Meyvə piştaxtalarından keçərkən çiyələk, alça kimi yay meyvələri qarşımıza çıxır. Lakin piştaxtaklarda qarpız, yemiş kimi meyvələrə də rast gəlmək mümkündür. Bildiyimiz kimi hələ həmin meyvələrin yetişmə vaxtı deyil. İnsanlara maraqlıdır ki, görəsən o meyvələri tam vaxtı olmadan alıb yemək olarmı? Vaxtından əvvəl satılan meyvələr insan sağlamlığına necə təsir göstərə bilər?
Mövzu barədə Medianews.az-a danışan qida eksperti Fərid Səfərov bildirdi ki, vaxtından əvvəl satılan meyvələr sağlamlığımıza zərərlidir:
“İndi biz hər mövsümdə piştaxtalarda qoxusuz və dadsız meyvə, tərəvəzlərlə rastlaşırıq. Mövsümdən kənar istehlak edilən meyvə və tərəvəzlərin qida dəyəri daha aşağıdır. Yetişdirilərkən süni gübrə, pestisid, süni qoruyucu istifadə olunur. Bu isə sağlamlığımız üçün təhlükəlidir, baş ağrısı, qusma, hətta xərçəng və astma xəstəliyinə səbəb olur”.
Ekspert bildirdi ki, meyvələri vaxtında alıb istifadə etməyiniz daha məsləhətə uyğundur:
“Hazırda satışda olan qarpız, yemiş kimi iyul ayında yetişməli olan meyvələrin də sağlamlığımız üçün heç bir faydası yoxdur, həm də daha bahalıdır. Bazardan meyvə və tərəvəz alarkən diqqətli olun, meyvələr iri, iysiz olmamalı, hamar, büzüşməmiş, sulu və dadlı olmalıdır və çalışın, mövsümə uyğun meyvə və tərəvəz alasınız. Eyni zamanda, mövsümə uyğun olmayan meyvə və tərəvəzləri daha baha almaq əvəzinə, həmin meyvə və tərəvəzləri bol olduğu mövsümdə alaraq dərin dondurucuda 6 ay qədər saxlaya bilər və istədiyiniz anda istifadə edə bilərsiniz”.
Zərif Ülvizadə
Medianews.az