Sürücülər hansı dərmanları qəbul etməməlidirlər?

Sürücülüyə təsir edə biləcək yan təsirlərə ən çox səbəb olan dərman kateqoriyalarına antihistaminiklər, sedativlər, opioid analjeziklər, antipsixotiklər, əzələ gevşeticiləri, parkinsonizm əleyhinə dərmanlar, bəzi antidepresanlar, anksiyolitiklər (narahatlığı müalicə etmək üçün istifadə olunan dərmanlar) və bəzi antihipertenziv dərmanlar daxildir.
Medianews.az  xəbər verir ki, “Ozon Pharmaceuticals” şirkətinin marketinq direktoru Valentina Milovanova gazeta.ru-ya bildirib.
“Sürücülər üçün əks göstəriş olan reseptli və reseptsiz dərmanların ümumi, universal siyahısı yoxdur. Lakin təlimatlarda “Əks göstərişlər” və ya “Yan təsirlər” bölməsində dərmanın sürücülük qabiliyyətinə təsir edib-etmədiyi göstərilə bilər. Əgər təlimatlarda dərmanın sürücülük zamanı yuxululuğa, diqqətin azalmasına və ya potensial təhlükəli digər vəziyyətlərə səbəb ola biləcəyi göstərilirsə, sürücülükdən çəkinmək lazımdır”, - mütəxəssis izah edib.
Bildirilib ki, yuxululuğa və ya diqqətin zəifləməsinə səbəb olan dərmanlar sürücülük performansına aşağıdakı yollarla təsir edə bilər: xarici stimullara reaksiyaların yavaşlaması, yolda diqqəti cəmləmək və tez qərar qəbul etmək qabiliyyətinin azalması, yuxululuğa və hətta qısa müddətli huşun itirilməsinə səbəb olmaq, başgicəllənməyə və görmənin zəifləməsinə səbəb olmaq.
Milovanova yekun olaraq bildirib ki, yol təhlükəsizliyi yalnız qaydalara riayət etməkdən deyil, həm də sürücünün vəziyyətindən asılıdır. Dərman qəbulu səbəbindən reaksiya vaxtınız və diqqətiniz zəifləyərkən avtomobil idarə etməklə öz həyatınızı və ya başqalarının həyatını təhlükəyə atmamalısınız.