Braziliyanın Jojinvili şəhərində 37 yaşlı qadın özünü 12 yaşlı qız kimi təqdim edərək bir ildən çox müddət ərzində başqa bir ailənin yanında yaşayıb.
Medianews.az xəbər verir ki, qadın “Qabriyele” adını istifadə edib və əvvəlcə kilsəyə gedərək guya zorakı valideynlərdən qaçdığını deyib.
Kilsə üzvləri onun hekayəsinə inanaraq ona kömək ediblər və bir ailə onu evinə qəbul edib.
Qadın özünü uşaq kimi göstərmək üçün davranışlarını dəyişib, hətta gecələr panik ataklar keçirdiyini, uşaq səsi ilə danışdığını iddia edib. O, 14 ay ərzində həmin ailə ilə yaşayıb və özünü 12 yaşlı kimi aparıb.
Ailə ona inanaraq onu öz qızları kimi qəbul edib, hətta ad günü də keçirib və müalicə xərclərini ödəyib.
Hadisə ailənin bir qohumunun şübhələnməsi ilə üzə çıxıb və polisə məlumat verilib. Qadının illərdir müxtəlif ailələri aldatdığı müəyyən edilib.
O, hazırda həbsdədir və məhkəməni gözləyir.
Medianews.az