Qarşıdan Yeni il gəlir və bayram süfrələrində spirtli içkilərin yer alması bir çoxları üçün adi haldır. Həkimlər isə xatırladır ki, spirtin orqanizmə təsirini tamamilə “zərərsizləşdirmək” mümkün olmasa da, həm bayram günü, həm də ertəsi gün fəsadları azaltmaq üçün müəyyən tibbi tövsiyələrə əməl etmək olar.
"Yeni Sabah" xəbər verir ki, həkimlərin fikrincə, spirt qəbulundan əvvəl orqanizmin hazırlanması vacibdir. Bayram gününə ac qarına başlamaq düzgün deyil. Zülal və yağ tərkibli qidalar, yəni ət, balıq, pendir, qatıq kimi məhsullar mədədə spirtin sorulmasını ləngidir və qanda alkoqolun sürətlə yüksəlməsinin qarşısını qismən alır. Eyni zamanda, gün ərzində kifayət qədər su içmək dehidrasiyanın qarşısını alır. Qazlı içkilərlə spirtin birlikdə qəbulu isə məsləhət görülmür, çünki qaz mədədə alkoqolun sorulmasını sürətləndirir.
Bayram axşamı spirtli içki qəbul edərkən növ və miqdar məsələsi də önəmlidir. Həkimlər müxtəlif spirt növlərini qarışdırmağın orqanizm üçün daha ağır yük yaratdığını bildirirlər. Hər qədəhdən sonra su içmək, yavaş-yavaş içmək və fasilələr vermək intoksikasiya riskini azalda bilər. Aktivləşdirilmiş kömür və ya digər sorbent preparatlar bəzi hallarda köməkçi sayılsa da, onlar spirtin təsirini tam aradan qaldırmır və yalnız bağırsaqlarda olan toksinlərin bir hissəsini bağlayır.
Rusiyalı alim-həkim, toksikologiya üzrə mütəxəssis, tibb elmləri doktoru Sergey Belovun sözlərinə görə, “alkoqolun əsas zərəri onun parçalanması zamanı yaranan asetaldehidlə bağlıdır və orqanizm bu maddəni neytrallaşdırmaq üçün vaxt və resurs sərf edir. Ən böyük səhv spirtin təsirini dərmanlarla ‘sürətləndirmək’ cəhdidir. Xüsusilə ağrıkəsicilərin və qaraciyərə təsir edən preparatların alkoqolla birlikdə qəbulu təhlükəlidir”. Həkim qeyd edir ki, B qrupu vitaminləri və maqnezium tərkibli qidalar sinir sistemi üçün faydalı ola bilər, lakin onlar möcüzəvi təsir göstərmir.
Yeni ildən sonrakı gün, yəni “sabahsı gün” üçün əsas tövsiyə istirahət, maye qəbulu və yüngül qidalanmadır. Mineral sular, şorbalar, təbii meyvə şirələri və fermentləşdirilmiş süd məhsulları elektrolit balansının bərpasına kömək edir. Güclü baş ağrısı, ürəkbulanma və ya ürəkdöyünmə olduqda spirtlə uyğun olmayan dərmanlardan uzaq durmaq, vəziyyət ağırdırsa həkimə müraciət etmək vacibdir. Rusiyalı mütəxəssislər vurğulayırlar ki, “hangover” vəziyyətində yenidən spirt qəbul etmək qısamüddətli rahatlıq versə də, ümumi vəziyyəti daha da ağırlaşdıra bilər.
Həkimlərin ümumi qənaəti ondan ibarətdir ki, spirtin zərərini azaltmağın ən etibarlı yolu ölçülü olmaqdır.
