Rusiyada "valideyn maaşı" adlı maraqlı və yeni təkliflər ortaya çıxıb.
Medianews.az TASS-a istinadla xəbər verir ki, Dövlət Dumasında işləməyən, uşaq böyüdən valideynlərə hər uşaq üçün yaşayış minimumuna bərabər aylıq "valideyn maaşı" verilməsi təklif edilir. Bu ideyanı "Ədalətli Rusiya" fraksiyasının lideri Sergey Mironov Analar Günündən əvvəl irəli sürüb.
Parlamentarinin sözlərinə görə, bu addım bir valideynə (adətən anaya) uşağın yetkinlik yaşına çatana qədər böyüdülməsi dövründə maliyyə dəstəyi verəcək. O, fraksiyanın artıq 2021-ci ildə oxşar ödənişlər haqqında qanun layihəsi təqdim etdiyini və onun tətbiqi üçün çalışdığını vurğulayıb. Mironov qeyd edib ki, ana əməyi təkcə ailə üçün deyil, həm də dövlət üçün vacibdir və bu əmək maddi cəhətdən mükafatlandırılmalıdır.
Deputat onu da əlavə edib ki, artıq bir sıra bölgələrdə Analar Günündə əsasən çoxuşaqlı qadınlara birdəfəlik ödənişlər təklif edilir. Bununla bağlı federal dəstək mexanizminin yaradılması da təklif edilib. O belə hesab edir ki, analara dəstək tədbirləri yalnız bayramla məhdudlaşmamalıdır.
