Lvovun mərkəzində terror aktı törətməkdə şübhəli bilinən şəxsin Rusiya xüsusi xidmət orqanlarının göstərişi ilə hərəkət edən Rivne (Rovno) vilayətinin 33 yaşlı sakini olduğu məlum olub.
Bu barədə Ukrayna Milli Polisi məlumat yayıb.
Hüquq-mühafizə orqanlarının məlumatına görə, qadın Rusiya xüsusi xidmət orqanlarının qondarma "kuratoru"nun göstərişi ilə əldəqayırma partlayıcı qurğular hazırlayıb və onları əvvəlcədən müəyyən edilmiş yerlərə quraşdırıb.
Bildirilib ki, birgə əməliyyat tədbirləri nəticəsində polislər 7-ci Karpat Sərhəd Dəstəsinin sərhədçiləri ilə birlikdə bir neçə saat ərzində şübhəli şəxsin yerini müəyyən ediblər. Cinayətkar Starı Sambir şəhərinin nəzarət edilən sərhədyanı ərazisində yaxalanıb.
Qeyd olunur ki, cinayət işi üzrə ibtidai istintaqı Ukrayna Təhlükəsizlik Xidməti aparır. İttiham olunan ən ağır maddənin sanksiyası ömürlük azadlıqdan məhrumetmə cəzasını nəzərdə tutur./Teleqraf