Rusiya ordusu noyabrın 29-na keçən gecədən başlayaraq Ukraynanın paytaxtı Kiyevə növbəti dəfə çoxkombinasiyalı hava hücumu həyata keçirir.
“Qafqazinfo”nun məlumata görə, gecə saatlarında hava hücumundan müdafiə sistemi işə düşüb, partlayış səsləri eşidilir. Hava hücumu zamanı müxtəlif tipli, o cümlədən, ballistik raketlərdən, zərbə dronlarından istifadə edilib.
Zərərsizləşdirilən dronlar və raketlər Kiyevin bəzi yaşayış binalarında yanğına səbəb olub.
Kiyev şəhər meri Vitali Kliçko “Teleqram” səhifəsində yazıb ki, hava hücumu nəticəsində Darnitsk və Şevçenko rayonlarının çoxmərtəbəli binalarında dağıntılar qeydə alınıb. Həmin rayonlara həkim çağırışları qeydə alınıb.
Kiyev şəhər Hərbi Administrasiyasının rəhbəri Timur Tkaçenko bildirib ki, biri uşaq olmaqla altı mülki şəxs xəsarət alıb. Xəsarət alan qadınlardan biri ağır vəziyyətdə xəstəxanaya yerləşdirilib.
“Biz yerlərdən birində qadının ölməsi ehtimalı ilə bağlı xəbərləri araşdırırıq”, - deyə Tlaçenko əlavə edib.
Onun sözlərinə görə, hava hücumu zamanı Kiyevin 6 ərazisində yaşayış binalarına ziyan dəyib.
Kiyev sakinləri təhlükəsizlik üçün metro stansiyalarından sığınacaq kimi istifadə edirlər.
***
Rusiya ordusunun artıq 7 saatdan çoxdur Kiyevə endirdiyi hava zərbələri nəticəsində ölən və yaralananların olduğu bildirilir.
Kiyev Şəhər Hərbi Administrasiyasının açıqlamasında hücum zamanı ən azı 1 nəfərin həlak olduğu, 11 nəfərin isə yaralandığı vurğulanır. Paytaxtın bir neçə rayonunda üç çoxmərtəbəli yaşayış binasında dağıntılar qeydə alınıb.
Hazırda hadisə yerlərində dağıntıların aradan qaldırılması davam edir. Kiyev və Ukraynanın digər bölgələrində hava həyəcanı siqnalı hələ də qüvvədədir.
