“Kainat gözəli 2025” müsabiqəsi ətrafında qalmaqallar səngimək bilmir. Müsabiqənin direktoru Raul Roçaya qarşı narkotik qaçaqmalçılığı ittihamlarının gündəmdə olduğu bir zamanda diqqət bu dəfə qalibə - meksikalı Fatima Boşa yönəlib.
“Qafqazinfo” xəbər verir ki, o, tacı qazandıqdan sonra kəskin tənqidlərə məruz qalıb.
Mübahisələr Omar Harfuşun müsabiqənin saxtalaşdırılması ilə bağlı iddialarından sonra daha da güclənib. Sosial mediada istifadəçilər dərhal “Kainat gözəli” müsabiqəsinin rəhbəri Raul Roça Kantu ilə qalibin atası Bernardo Boş Fernandez arasında mümkün biznes əlaqələrinə diqqət çəkiblər.
Meksikanın “Reforma” qəzetinin məlumatına görə, Bernardo Boş Fernandez 2017-ci ildən “Pemex Exploración y Producción” (PEP) şirkətində baş menecerin müşaviri kimi çalışır və şirkətdə ümumilikdə 30 illik təcrübəyə malikdir. Onun əsas vəzifəsi strateji layihələrin müəyyənləşdirilməsi və monitorinqidir.
Bu ilin əvvəlində “Petrobras”ın törəmə müəssisəsi olan “Pemex” ilə Raul Roça Kantuya məxsus “Soluciones Gasíferas del Sur” şirkəti arasında iş birliyinin olduğu məlum olub.
“Eme Equis”in məlumatına əsasən, Roçanın şirkəti “Pemex”dən 34,5 milyon avro dəyərində quru boru kəməri tikintisi üzrə müqavilə alıb. Raul Roça Boş ailəsi ilə əlaqələrə dair iddiaları inkar edərək “heç bir bağının olmadığını” bəyan etsə də, mediada yayılan yeni məlumatlar bu müdafiəni zəiflədib.
Roça hazırda yalnız müsabiqədə saxtakarlıq iddiaları ilə deyil, həm də narkotik, silah və yanacaq qaçaqmalçılığı ittihamları ilə üzləşir.
Bernardo Boş Fernandez isə rəsmi olaraq şübhəli şəxs elan olunmasa da, onun adı daha əvvəl də araşdırmalarda keçib. “Reforma”nın digər məlumatında bildirilir ki, Boş 2019-cu ildə Baş Prokurorluq (FGR) tərəfindən 300 min avrodan çox qanunsuz varlanma şübhəsi ilə yoxlanılıb. Hesabatda qeyd olunub ki, o, 2011-2015-ci illər arasında dövlət məmuru kimi aldığı rəsmi maaşla müqayisədə xeyli yüksək - 6,5 milyon pesodan çox gəlir əldə edib və bunun hüquqi izahı təqdim olunmayıb.
Nəticədə Boş 2022-ci ildə aktivlərini açıqlamaqdan və ya maraqlar toqquşması barədə məlumat verməkdən imtina etsə də, araşdırmalar qanunsuz varlanmaya dair dəlil tapılmadığı üçün bağlanıb.
Bütün bu məlumatlar həm medianın, həm də “Kainat gözəli” izləyicilərinin diqqətini yenidən müsabiqənin nəticələrinə yönəldib. Sosial şəbəkələrdə təzyiq artır, müsabiqənin obyektivliyi və şəffaflığı ilə bağlı suallar isə hələ də cavabsız qalır.
