Siyasi fəaliyyətlə məşğul olanların həbs olunmasını qətiyyən istəməzdim. Çünki bu sıxıntıları özümüz də vaxilə yaşadığımızdan, hər zaman cəmiyyətdə siyasi münasibətlərin və rəqabətin mədəni səviyyədə aparılmasını arzulamışam. Lakin düşünürəm ki, hakimiyyət orqanlarının əlində yetərli səviyyədə əsaslar olmasaydı, həm uzun müddət dövlət orqanlarında ən yüksək postlardan birinə sahib olmuş Ramiz Mehdiyevin dövlət əleyhinə fəaliyyəti, həm də Əli Kərimlinin əməkdaşlığı ilə bağlı məqamlar üzrə bu cür sərt addımlar atılmazdı. Hər halda istintaq orqanları bu cinayət işini hərtərəfli araşdırdıqdan sonra daha aydın mənzərə üzə çıxacaq.
Pravda.az xəbərinə görə, bunu deputat Fazil Mustafa bildirib.
"Bir məqamı vurğulaya bilərəm ki, bu radikal müxalifətçiliyin gəlib çıxa biləcəyi proqnozlaşdırılan dalanlardan biridir. Barışmaz müxalifətçilik mövqeyindən durub mötədil müxalif siyasət kursu sərgiləyən bizlərə illərdir olmazın böhtan və şantajlarını rəva görənlərin yenidən bir durum dəyərləndirməsinə ehtiyac var. Barışmaz deyibən hakimiyyətə qarşı hər cür düşmən ünsürlərlə birlikdə olmağa sıradan bir məsələ kimi yanaşanların indi dövlətə qarşı hər cür qüvvə ilə müttəfiqlikdə günahlandırılması da artıq ehtimaldan çox bir reallıq kimi qəbul oluna bilir. Dəfələrlə konkret irad bildirdiyimiz bir məsələni yenidən xatırladıram: Qərb demokratiyasını ideallaşdırb, Azərbaycanda liberal dəyərlərin bərqərar olması üçün mübarizə apardığını bəyan edən AXCP və ya Milli Şuranın dırnaqarası öndərlərinin İrançı teokratik totalitarizmi təbliğ edən və dünyəvi dövlətimizə qarşı cihadı ali məqsədinə çevirmiş Tale Bağızadənin dəfələrlə müdafiəsinə qalxmalarının izahını verən hələ ki, tapılmadı. İndi də qarşılaşılan situasiya bu məsələdən elə də fərqli deyildir. Artıq bundan sonrası illərdir yalançı hədəflərlə, vədlərlə aldatdıqları insanların öz düşüncələrinə yenidən baxmasına qalır", - F.Mustafa qeyd edib.
