Cefri Epşteyn qalmaqalının əsas fiqurlarından biri olan Qisleyn Maksvell illər boyu Epşteynin demək olar ki, bütün məclislərində yer alıb. Uzun müddət ictimaiyyət üçün “gizli qadın” kimi tanınan Maksvellin kimliyi və taleyi Epşteynin ölümündən sonra daha da diqqət mərkəzinə düşüb.
Qisleyn Maksvell 25 dekabr 1961-ci ildə Fransada anadan olub. Böyük Britaniya vətəndaşı olan qadın media maqnatı, qalmaqallı iş adamı Robert Maksvellin qızıdır. Təhsilini İngiltərədə alan Qisleyn daha sonra ABŞ-yə köçərək uzun illər orada yaşayıb. O, Nyu-York və digər iri şəhərlərin elit çevrələrində fəal iştirak edən, yüksək səviyyəli əlaqələri ilə seçilən bir sima kimi tanınıb.
Maksvellin adı birbaşa amerikalı maliyyəçi Cefri Epşteynlə bağlıdır. ABŞ prokurorluğunun iddialarına görə, o, Epşteyn üçün yetkinlik yaşına çatmayan qızları tapıb, onları yönləndirib və cinsi istismara hazırlayıb. İstintaq materiallarında onun Epşteynin yaratdığı cinsi istismar və insan alveri şəbəkəsində aktiv rol oynadığı vurğulanır.
Qisleyn Maksvell 2020-ci ildə ABŞ-də həbs edilib. 2021-ci ildə keçirilən məhkəmə prosesində münsiflər heyəti onu yetkinlik yaşına çatmayanların cinsi istismarına və insan alverinə yardım etməkdə təqsirli bilib. 2022-ci ildə isə məhkəmə Maksvell barəsində 20 il müddətinə azadlıqdan məhrumetmə hökmü çıxarıb.
Cefri Epşteynin 2019-cu ildə həbsxanada müəmmalı şəkildə ölməsindən sonra ictimaiyyətin və medianın diqqəti əsasən Maksvellə yönəlib. Onun siyasət, iri biznes və hətta kral ailələri ilə qurduğu əlaqələr uzun müddət müzakirə mövzusu olub. Xüsusilə Böyük Britaniya şahzadəsi Endryu ilə bağlılığı qalmaqalın ən çox danışılan məqamları sırasında yer alıb.
Qisleyn Maksvell ABŞ-də federal həbsxanada cəzasını çəkir. Epşteyn şəbəkəsi ilə bağlı ondan daha çox məlumata sahib olduğu, lakin bəzi detalları hələ də açıqlamadığı barədə iddialar ictimai müzakirələrdə qalmaqda davam edir.
Musavat.com
