AXCP sədri və Milli Şura lideri Əli Kərimli “Ramiz Mehdiyev işi” çərçivəsində aparılan istintaq tədbirləri nəticəsində saxlanılıb.
Sosial şəbəkələrdə yayılan məlumatlar Musavat.com-un mötəbər mənbələri tərəfindən təsdiqlənib. Bildirilir ki, saxlanılma Mehdiyevlə ehtimal edilən siyasi əlaqələrin araşdırılması ilə bağlıdır və proses üzrə hüquqi qiymətləndirmə davam edir.
Xatırladaq ki, Sabail rayon Məhkəməsi xüsusilə ağır cinayət əməllərinə görə cinayət məsuliyyətinə cəlb edilmiş Ramiz Mehdiyev barəsində verilmiş vəsatəti təmin edərək onun barəsində 4 ay müddətinə ev dustaqlığı qətimkan tədbiri seçib. Ramiz Mehdiyev Azərbaycan Respublikası Cinayət Məcəlləsinin 278.1-ci (dövlət hakimiyyətini ələ keçirməyə yönələn əməllər), 274-cü (dövlətə xəyanət) və 193-1.3.2-ci (cinayət yolu ilə əldə edilmiş əmlakı külli miqdarda leqallaşdırma) maddələri ilə ittiham olunur.
İstintaq versiyalarına görə, Mehdiyevin Rusiyanın xüsusi xidmət orqanları ilə gizli əlaqələr saxlaması, Azərbaycanda hakimiyyətin dəyişdirilməsi, prezident üsul-idarəsinin ləğv edilərək onun rəhbərliyi ilə 50 nəfərlik “Dövlət Şurası”nın yaradılması cəhdləri araşdırılır. Məlumatlara əsasən, Mehdiyevin həmin məxfi şurada müxalifət daxilindən, o cümlədən Əli Kərimlinin də adını hallandırdığı iddia olunur.
Hazırda Əli Kərimlinin bu proseslərlə bağlı hansı rola malik olub-olmaması və ya əlaqələrin hansı xarakter daşıdığı istintaq tərəfindən araşdırılır. Onun hansı maddələrlə ittiham ediləcəyi barədə yaxın vaxtlarda əlavə məlumatın açıqlanacağı gözlənilir.
Hazırda istintaq orqanlarının başqa həbslər də apardığı bildirilir.
