Yeni aparılan elmi araşdırma göstərib ki, rahat yuxu üçün ən təsirli üsul düşündüyümüz kimi ənənəvi fiziki məşqlər deyilmiş. Mütəxəssislər yuxusuzluqdan əziyyət çəkən insanlar üçün ən sürətli nəticə verən fəaliyyətin yoqa olduğunu bildirirlər.
Musavat.com xəbər verir ki, Çinin Harbin İdman Universitetinin tədqiqatçıları müxtəlif ölkə və yaş qruplarından 2500-dən çox yuxu pozuntusu yaşayan iştirakçının məlumatlarını əhatə edən 30 klinik araşdırmanı analiz ediblər.
Analiz göstərib ki, yoqa gecə yuxusunun keyfiyyətini ən nəzərəçarpacaq dərəcədə yaxşılaşdıran üsuldur. Bu təsiri əldə etmək üçün həftədə iki dəfə, 30 dəqiqədən az müddətdə məşq etmək kifayət edir.
Yoqa zamanı tətbiq edilən nəfəs nəzarəti parasimpatik sinir sistemini - yəni istirahətdən məsul olan sistemi aktivləşdirərək bədəni rahatlaşdırır və yuxuya keçidi asanlaşdırır.
Araşdırmaya görə, yoqadan sonra ən çox tövsiyə edilən ikinci fəaliyyət yürüyüş olub. Lakin mütəmadi yürüyüşün nəticəsi 8–10 həftə sonra özünü göstərir.
