Antihitler koalisiyasında olmuş dövlətlərin heç biri Moskvaya gəlmədi

"Moskvada 9 may paradına vaxtilə rəsmən antihitler koalisiyasında olmuş dövlətlərin heç biri qatılmayıb". Politoloq Aydın Quliyev Medianews.az-a açıqlamasında belə deyib. O qeyd edib ki, 9 may Qələbə paradına 27 dövlətin təmsilçisi qatılıb: "Həmin 27 dövlətin 7-si MDB ölkələri idi. İkinci Dünya müharibəsi vaxtı onlar müstəqil dövlət deyildilər. Hindistan, Vyetnam, Koreya, Slovakiya, Serbiya və Bosniya-Herseqovina da İkinci Dünya müharibəsindən sonra yaradılmış dövlətlərdir. Monqolustan və İsrail də müharibədən sonra yaranmış dövlətlər olduqları üçün faşizmlə mübarizəyə ayrıca dövlət olaraq töhfə verdikləri ilə qürur duya bilməzlər. Venesuela, Kuba, Braziliya da faşizm üzərində qələbəyə heç bir töhfə qatqısı olmayan ölkələrdir. İran müharibə vaxtı Rza şahın özü başda olmaqla gözlərini dikmişdilər Hitlerin ağzına, ölkə faşist casusları ilə dolu olduğu üçün 1941-ci ildə Britaniya cənubdan, SSRİ isə şimaldan İrana soxularaq ölkəni böldülər, Rza şahı da qovdular. Beləsinin də 80 il sonra paradda iştirakı ciddi məzmun sayıla bilməz. Paradın əsas qonağı adlandırılan Çin isə müharibə vaxtı Yaponiyanın işğalı altında idi. Ən əsası isə odur ki, İkinci Dünya müharibəsində antihitler koalisiyasının rəsmi üzvü olmuş bircə dövlət belə Moskva paradında iştirak etmədi. Fransa, İngiltərə, ABŞ, Kanada, İspaniya, Portuqaliya və başqa dövlətlərin heç birinin rəhbəri Moskvada yox idi. Belə çıxır ki, əslində 9 May Moskva paradı dünya tərəfindən boykot olunub. Daha pisi isə o oldur ki, bu parada gələnlərin hamısı Putinin Ukraynaya qarşı istilaçı müharibəsini dəstəkləyən ölkələrdir. Belədə 9 May paradı antifaşist aksiyası yox, Ukraynaya qarşı Putin müharibəsi ilə "həmrəylik aksiyası" idi". Toğrul Əli, Medianews.az