Media
Ankaraya səfər edən İngiltərə xarici işlər naziri Liz Truss Türkiyə xarici işlər naziri Mövlud Çavuşoğlu ilə görüşüb .
Medianews.az xəbər verir ki, Çavuşoğlu görüşdən sonra verdiyi ortaq mətbuat şərhində “Ukraynadakı taxılın Rusiya tərəfindən oğurlandığı” iddialarını ciddi qəbul etdiklərini və araşdırdıqlarını bildirib. Çavuşoğlu, “Ukrayna taxılının Rusiya və ya bir ölkə tərəfindən beynəlxalq bazarlara qanunsuz satışına qarşıyıq. Türkiyə olaraq bu məhsulların bizə gəlməsinə qətiliklə icazə verməyəcəyik” deyə bildirib.
Britaniya Naziri Truss isə bildirib ki, “taxıl böhranı məsələsinin təcili olduğunu açıq-aşkar bilirik, gələn ay ərzində həll edilməlidir”. Böhranın həll edilmədiyi təqdirdə dünyada aclığın yarana biləcəyini ifadə edən Truss, İngiltərənin böhranın həlli üçün ekspert dəstəyi təklif etdiyini söyləyib.
Truss bəyan edib ki, Rusiya tərəfindən işğal olunmuş Ukraynadan taxıl çıxarılması üçün ticarət gəmilərinə təhlükəsiz keçid təmin edilməlidir.
Xatırladaq ki, Rusiya Müdafiə Nazirliyi dünən bəyan edib ki, Rusiya və Türkiyə hərbi nümayəndə heyətləri Ukrayna limanlarından taxıl ixracı və gəmilərin limanlardan təhlükəsiz yola salınması ilə bağlı məsləhətləşmələri davam etdirmək barədə razılığa gəliblər.
Qeyd edək ki, dünyanın əsas taxıl ixracatçılarından olan Ukraynanın taxıl ixracı Rusiyanın fevral ayında başlatdığı işğala görə dayanıb. Rusiya isə ərzaq böhranına görə məsuliyyət daşıdığını inkar edir və ərzaq təchizatı problemlərinə görə Qərb ölkələrinin tətbiq etdiyi sanksiyaları günahlandırır.
Digər tərəfdən, İngiltərə müdafiə naziri Ben Uolles bu gün Ankarada olacaq. Wallace, keçən həftə verdiyi açıqlamada, Türkiyənin Finlandiya və İsveçin NATO üzvlüyünə etirazlarını türk rəsmilərlə müzakirə edəcəyini və Türkiyənin qeyd-şərtlərinin dinlənilməsi lazım olduğunu söyləyib.
Leyla, Medianews.az
