Media
Bizdə hansısa müxalifətçi “ümummilli məsələlərdə iqtidarla həmrəylik göstərilməlidir” deyirsə dərhal qardaşın (ya da bacının) hansı yuvanın quşu olmasını, yaxud daha dəqiqləşdirsək, hansı budağa qonmağa hazırlaşdığını anlamalıyıq. Adamlar bununla açıq-aydın siqnal verirlər ki, biz daha müxalifət olmaqdan yorulmuşuq, bizə də anbarın bir küncündən taxılı daşımağa şərait yaradın. Yoxsa hansı milli məsələdən söhbət gedir? Bunlar anekdotdan başqa bir şey deyil. Azərbaycan iqtidarının həyatda olduğu bütün illər ərzində korrupsiyadan, talançılıqdan başqa milli fəaliyyət proqramı olmamışdır. Müxalifətçi “milli məsələdə həmrəyik” deyərkən “biz də oğurlamaq istəyirik” işarəsi verir.
Əslində bu, çox yaxşı haldır. Müxalifəti iqtidarına bənzəyən xalqlar xoşbəxt olur, belə izdivacdan törəyən uşaqlar sağlam böyüyürlər.
Deyilə bilər ki, yazıq müxalifət neyləsin, iqtidarın ömrü uzun çəkdi, atı atın yanına bu qədər müddətə örükləsən nəinki həmxasiyyət və həmrəng olarlar, hətta siam əkizləri kimi yapışarlar. (Düzü, atlar arasında siam əkizləri olurmu, bu haqda heç bir bilgim yoxdur. Belə bir atı fiziki təsəvvür etmək nə qədər çətin olsa da mənəvi təsəvvür o qədər asandır: gözümüz önündə Azərbaycan iqtidarı və müxalifəti vardır). Ancaq bu nisyə söhbətdir. Elə qısa müddətdə də bunlar bir-birinə bənzəyirdilər, örnək üçün, sonradan iqtidara satılan müxalifətçilərin əvvəlki davranışlarını göz önünə gətirəndə gələcək üçün nə qədər aydın işarələr olması sezilir. Sadəcə, bizim gözümüz örtülü olmuşdur. Xalqımıza, onun müxalifət və iqtidarına çox məhəbbətlə yanaşmışıq. Məhəbbətin isə gözləri kordur, məlum məsələdir. Nağılda divin qurbağanı sevməsi kimi.
Milli Təhlükəsizlik Nazirliyinin parçalanması əməliyyatı bu baxımdan bizə çox tanış gəldi. Nəyi xatırladırdı? Ay sağ olasınız: Azərbaycan Xalq Cəbhəsinin bölünməsini. Yazdıq axı – mübarizə imitasiyası uzun çəkdikcə iqtidar da müxalifətə oxşamağa başlamışdır. Nə tökərsən aşına, o çıxar qaşığına. Özgəyə partiya bölənin, öz nazirliyi quyuya düşər. Nazir dedi idarəmdə qızıl var, prokurorluq dedi yığıb gəlirik. Bunlar hamısı, gördüyünüz kimi, milli məsələdir, folklordan, soy kökümüzdən gəlir.
Yaxın gələcəkdə MTN-in DTX və XKX-yə mitoz bölünməsi davam edəcəkdir. DTX içindən bir qrup ayrılıb Klassik DTX yaradacaqdır. XKX isə Bütöv Azərbaycan XKX olacaqdır. Sən hesab edirsənsə bunlar zarafat, qara yumordur, o zaman tariximizi heç oxumamısan. Bunlar hamısı tariximizin təkrarıdır. İç Oğuzlar Dış Oğuzlara düşmən idi. 24 tayfanın hərəsi bir tərəfə baxırdı. Ağqoyunlular qaraqoyunluları adam saymırdı. Şəkililər qarabağlıları soymaq istəyirdi, bakılılar qubalıları. Yazıq Qazan xan ildə bir dəfə Neft Fondunun… üzr istəyirəm, yanlış getdi – xəzinənin ağzını açıb yağmalama elan edirdi. Xalq gəlirdi, hərə əlinə keçəni çırpışdırıb aparırdı. Bəzi xarici marketlərdə endirim kampaniyası zamanı piştaxtaları necə silib-süpürürlərsə, bax, onun kimi. Düzdür, indi piştaxtalar onsuz da boşdur, dünya erməni kilsələrinə müftə qaz verən o boyda SOCAR qənaət proqramı elan edib, ancaq təşkilatı bölməyin ziyanı yoxdur. Örnək üçün, bizdə Xalq Cəbhəsi çoxaldıqca ermənilər qorxuya düşürdülər, bilmirdilər daha hardan onlara qarşı cəbhə açacağıq.
Əsas odur qabaqlayıcı tədbirlər görülüb, əhalinin qışqırışması mümkün olmayacaqdır. Bəs necə, dünənə qədər qışqırmağın cəriməsi 30-40 manat idisə, indən belə 400-500 manat olacaqdır. Səsimizi ayrı cür kəsə bilməzdilər. Axı biz üsyankar camaatıq. 1989-cu ildə Yaponiyanın “Hokkaydo şimbun” qəzetinin rəy sorğusuna görə “Planetin xalqı” seçilmişdik. İnşallah, indiki zəncirvari bölünmələrimizdən alınan istilik enerjisi ilə dünyanın ən enerjili, ən nüvəli xalqı sayılarıq.
Mən bölünmə məsələsində iqtidarla həmrəyəm.
