İcra başçıları Prezident Administrasiyasında danlandı

Bir neçə rayonun rəhbərliyinə sonuncu xəbərdarlıq edilib Bir neçə rayonun icra başçısı Prezident Administrasiyasına çağrılaraq xəbərdarlıq edilib. Bu barədə məlumatı tia.az-a administrasiyadakı mənbə verib. Bildirilir ki, bu il ərzində işindən ən çox narazılıq edilən, haqqında administrasiyaya şikayət ünvanlanan icra başçılarına irad bildirilib: “Hər il ənənəvi olaraq “rekordçu” icra başçıları çağrılaraq xəbərdarlıq edilir. Adətən onlara növbəti ilin ortalarınadək vaxt verilir. Özlərini düzəltməsələr, haqlarında şikayət yenə də çox olsa sərəncamları verilir”. Mənbənin sözlərinə görə, icra başçıları PA-da tək onların özlərindən yox, rayondakı digər qurumlardan olan şikayətlərə görə də cavab verməli olurlar. Odur ki, aşağıda adları çəkilən PA-ya çağrılan rayonların rəhbərlərinin vəzifələrinin bir neçə aylıq ömrü qalıb desək, yanılmarıq. Beləliklə, mənbənin bildirdiyinə görə, bir neçə gün öncə Ağsu, Laçın, Zərdab, Daşkəsən, Fizulu, Xocavənd, Qax, Zaqatala, Ağcabədi, Xacmaz, Oğuz, Şamaxı, Nərimanov rayonlarının icra başçıları administrasiyada xəbərdarlıq alaraq işlərinin başına dönüblər.