“Wi-Fi 802.11ac” yaşayış yerini tam əhatə etməklə məlumatları 1,3 Gb/s sürətlə ötürməyə imkan verir
“Wi-Fi Alliance” konsorsiumu məhsulların “Wi-Fi 802.11ac” simsiz rabitə standartına uyğun sertifikatlaşdırılmasına başlanıldığını elan edib. Bu isə o deməkdir ki, yeni standart tam təsdiqlənib və kommersiya bazarına çıxışa hazırdır. ANS PRESS Rabitə və İnformasiya Texnologiyaları Nazirliyinə istinadən xəbər verir ki, yeni standart “Wi-Fi” texnologiyasının məntiqi davamdır və məlumatların simsiz ötürülməsinə artmaqda olan tələbata cavab verməlidir.
“Wi-Fi 802.11ac” yaşayış yerini tam əhatə etməklə məlumatları 1,3 giqabit/saniyə sürəti ilə ötürməyə imkan verir ki, bu da “Wi-Fi 802.11”n standartı ilə müqayisədə təxminən 2 dəfə çoxdur. Bu HD formatlı filmləri 4 saniyədən də az vaxtda ötürməyə şərait yaradacaq.
Həmçinin yeni standartda 80 MHz və 160 MHz kanallarından 5 QHz diapazonunda istifadə etmək təklif edilib. 802.11ac qurğularının əksəriyyətinin 802.11n standartının istifadə etdiyi 2,4 QHz dəstəkləyən ikidiapazonlu olacağı gözlənilir.
Konsorsium nümayəndələri 802.11ac sertifikatlı ilk qurğuların yaxın vaxtlarda satışa çıxarılacağını planlaşdırırlar.