Madrid Avropa Universitetinin tədqiqatçıları müəyyən ediblər ki, gün ərzində bir neçə qısa gəzinti etməkdənsə, fasiləsiz və daha uzun müddətli gəzinti ürək sağlamlığı baxımından daha səmərəlidir.
Alimlər fiziki aktivlik göstəricilərini ölüm halları və ürək-damar xəstəlikləri ilə əlaqələndirərək geniş təhlil aparıblar. Tədqiqata gündə orta hesabla 8 min addımdan az yeriyən, eləcə də araşdırma başlanğıcında ürək-damar xəstəlikləri və ya xərçəng diaqnozu olmayan şəxslər cəlb olunub.
Təxminən 10 il davam edən müşahidələr zamanı 735 ölüm faktı və 3 119 ürək-damar hadisəsi, o cümlədən infarkt və insult qeydə alınıb. Nəticələr göstərib ki, fiziki aktivliyin forması böyük əhəmiyyət daşıyır. Ən yüksək risk əsasən çox qısa müddətli hərəkətlərlə kifayətlənən insanlarda müşahidə olunub. Xüsusilə 5 dəqiqədən az davam edən gəzintilər ölüm və ürək-damar ağırlaşmaları riskinin artması ilə əlaqələndirilib.
Ən aşağı risk göstəriciləri isə mütəmadi olaraq ən azı 15 dəqiqə fasiləsiz gəzən iştirakçılarda qeydə alınıb. Bu qrupda həm ölüm, həm də ürək-damar hadisələrinin sayı nəzərəçarpacaq dərəcədə az olub. Tədqiqat müəllifləri bildirirlər ki, bəzi hallarda çox qısa gəzintilər hələ aşkar olunmamış sağlamlıq problemlərinin nəticəsi də ola bilər.\Milli.Az
