Livanın cənubundakı 53 icmanın sakinləri İsrail ordusundan orada yerləşən Hizbullah hədəflərinə qarşı hücum barədə xəbərdarlıq alıblar.
Musavat.com xəbər verir ki, X-də ərəb dilində yayımlanan video mesajda hərbi sözçü livanlılardan təhlükəli zonada yerləşən evlərini tərk etmələrini tələb edib: "Siz dərhal ən azı bir kilometr aralıda yerləşən kəndləri tərk etməlisiniz. Hizbullaha məxsus hərbi infrastruktura hücum tezliklə həyata keçiriləcək."
Bundan əvvəl İsrail Hərbi Hava Qüvvələri Livan paytaxtının cənub kənarlarına hava hücumları həyata keçirib. Hava hücumlarında Hizbullahın hərbi qanadının bir neçə üzvü həlak olub. Ölənlər arasında Livanın cənubundakı müqavimət döyüşçülərinin əməliyyatlarından məsul olan əsas komandir də var. Mülki itkilər barədə heç bir məlumat yayılmayıb.