Kim nə deyir desin, şəxsən mən bu saat İranla respublikamız arasında münasibətlərin soyuqlaşmasına yaxşı baxmıram.
Birincisi, islam ölkəsidir, Allaha yaxın yerdir, sabah mollalar bəd dua eləsə, axırımız necə olar? Görərsən arvadlar oğlan uşağı doğmadılar. Dana çöldə qaldı, qurd yedi. Maşın dumana düşdü, aşdı dərəyə. Putin asqırdı, Xankəndində Araik qrip oldu.
İkincisi, nə qədər mollamız orada təhsil alıb gəlirdi, ölü basdırmaq işinə fayda verirdi. Ölülər ortada qalsa yaxşı olar? Olmaz. Özü də siz Ərəbistanda, Misirdə-zadda oxuyub gələn molla ilə İrandan gələn mollanı heç vaxt bir tutmayın. İran mollaları, vallahi, billahi, min dəfə yaxşı adamlardır. Məsələn, Ərəbistanda oxuyub gələn bir balağı kəsik qardaş var idi, Montin tərəfdə necə nifaq yuvası qurmuşdusa camaat indi də o tərəfdən keçməyə qorxur. İranın təhsil verdiyi molla isə yenə bilirsən Allah adamıdır, dil-zad qanır, ən böyük arzusu uzağı hansısa dul övrəti özünə siğə eləməkdir. Qurban olum İrandakı dinə. Ciddi sözümdür. Əfqanıstana, İŞİD-ə, Suriyaya, İraqa-filana baxıb şükür eləmədinizmi, hələ də?
Bir neçə il qabaq Tehranın bir polis rəisi var idi, harada teli yaylıqdan qırağa çıxan qız görsə, tutub bunların kəkilini kəsirdi. Guya kişinin oğlu əsl islam qaydaları yaradırdı. Bir gün bunun özünü açıq-saçıq qadınlarla gizli eyş-işrət edəndə tutdular.
Yəni orada hamı kimin kim olduğunu bilməsə də, başa düşür. Yola verirlər, dinc yanaşı yaşayırlar, uzağı hərdən bir qrup adamı krandan asırlar. Sözgəlişi, mən həmişə fikirləşmişəm, görəsən, İranda o adam asdıqları kran hansısa tikinti şirkətindən icarəyə götürülür, yoxsa elə adam asan idarənin əmlakıdır? Hər halda, eyni qurğu ilə həm ev tikmək, həm ev yıxmaq çox orijinal ideyadır, bunu hansı molla fikirləşibsə, halal olsun, o biri dünyada mütləq cənnətdə yetmiş yeddi huri ilə ödüllənəcəkdir.
Üçüncüsü, İranla münasibəti pisləşdirsək, sabah aftafa idxalında problem yaşayacağıq. Bu bizə lazımdırmı? İnanmıram. Müasir dünyada aftafa “ayfon” qədər vacib texnologiyadır. Özü də bunu hansısa kafir Amerikadan, Firəngistandan tapa, ala bilməzsən, yalnız İranda istehsal edilir. Xaricə səfər eləyən yoldaşlardan soruşun, görün hotellərdə aftafasız nə qədər əziyyət çəkiblər. Adam tanıyıram, bu işlər üçün dükandan gül vazası almağa məcbur olubdur.
Dördüncüsü, İranın səhvən öz hərbi texnikalarını, o cümlədən üstündən uçan təyyarələri vurması dünyaya məlumdur. İndi bəlkə Azərbaycana qarşı pis bəyanatları da səhvən veriblər? Örnək üçün, o ərdəbilli molla bəlkə bizə yox, ermənilərə hədə-qorxu gəlmək istəyirmiş? Olmayan yerdə din qardaşıyıq.
Ərdəbil demişkən, bu yerdə ulu şairimiz Sabirdən bir beytin yeri var. Elə o ərdəbilli molla üçün yazıbdır:
“Zənn edirdim mən bütün aləmdə İrandan səva,
Bir fərəhabad yer yoxdur o samandan səva,
Övrət olmaz hüsndə Fatma, Tükəzbandan səva,
Var imiş Rusiyyədə min-min pərizad, Ərdəbil!
Bir də namərdəm əgər etsəm səni yad, Ərdəbil!”
Sonda bir daha qeyd edim ki, İranla aramız yaxşı olmalıdır. Qonşuyuq. Üstəlik, orada neçə nəfər dilimizi bilən yaşayır. Ölkəmizin daimi dostu yoxdur, maraqları var. Ancaq İran da gərək siyasətdə incə olsun. Saman altdan su yeritməyi Qərb ölkələrindən öyrənsin.
Elə bu su məsələsində nəsə tərəqqi lazımdır: 1-ci Kserks dənizi qılınclamağı əmr eləmişdi, indiki İran rejimi də Araza və Xəzərə qamçı vurur. Hərçənd o vaxt yunanların da üstünə elə bizim kimi camaatları yığıb aparmışdılar, ancaq bu artıq ara pozan temadır, yazmıram.