Rusiyanın Novokuznetsk şəhərinin 1 saylı doğum evində 9 gün ərzində 9 körpə ölüb.
“Qafqazinfo” Rusiya mətbuatına istinadən xəbər verir ki, bu barədə ölkənin Kuzbas vilayətinin səhiyyə naziri Andrey Tarasov bildirib.
Faktla bağlı başlanılan istintaqın versiyasına görə, doğum evinin işçi heyətinin öz peşə vəzifələrini lazımi qaydada yerinə yetirməməsi səbəbindən 2026-cı ilin 4-12 yanvar tarixləri arasında yeni doğulmuş 9 körpə vəfat edib. Artıq xəstəxananın baş həkimi Vitali Xeraskov və adı açıqlanmayan şöbə müdiri saxlanılıblar. Onlar ehtiyatsızlıqdan ölümə səbəb olmaqda və səhlənkarlıqda şübhəli bilinirlər.
Regional səhiyyə nazirliyinin məlumatına görə isə ölən körpələrin hamısında bətndaxili infeksiya aşkarlanıb.
Qeyd edək ki, 2024-cü ildə sözügedən doğum evində 150 qayda pozuntusu aşkarlanıb.
