Noyabrın 29-u AXCP sədri Əli Kərimli və bir neçə yaxın adamı saxlanandan sonra hazırda Türkiyədə olan Milli Şura üzvü Gültəkin Hacıbəylinin də tutulduğu haqda xəbərlər yayıldı.
Həmin gün Gültəkin Hacıbəyli İstanbulda oğlu ilə birdə kirayədə yaşadığı evə hüquq mühafizə orqanı əməkdaşlarının gəldiyini, polis bölməsinə aparıldığını bildirdi, iki illik oturum izninə baxmayaraq Türkiyədən deportasiya olunacağı ehtimalını vurğuladı.
Medianews.az-ın məlumatına görə, noyabrın 30-u AXCP İdarə Heyətinin Avropada yaşayan üzvü Fuad Qəhrəmanlı feysbuk hesabında yazıb ki, Gultəkin Hacıbəyli ilə sonuncu dəfə gecə saat 1-də danışıb: “Onda artıq polis idarəsində idi”.
F.Qəhrəmanlının yazdığına görə, polis bölməsində G.Hacıbəylini oğlundan ayırıb təcridxanaya salıblar, oğlu Toğrula isə bölmədə gözləməyə icazə verməyiblər və onu ərazidən uzaqlaşdırıblar: “Noyabrın 30-u səhər isə öyrəndik ki, Gültəkin Hacıbəylini Azərbaycana deportasiya etmək üçün Arnavutköy deportasiya məntəqəsinə göndəriblər. Hazırda onunla heç bir əlaqə saxlamaq mümkün deyil”.
F.Qəhrəmanlı ehtimal edir ki, G.Hacıbəyli elə bu gün Azərbaycana göndəriləcək və elə Bakı aeroportunda saxlanılaraq Əli Kərimlinin həbsi üçün açılmış cinayət işi ilə bağlı istintaqa cəlb olunacaq.
Xatırladaq ki, AXCP sədri Əli Kərimli Dövlət Təhlükəsizlik Xidmətində saxlanılır. Müdafiəçilərinin yaydığı məlumata görə, ona Cinayət Məcəlləsinin 278.1-ci maddəsi ilə ittiham irəli sürülüb.
278-ci maddə “Hakimiyyəti zorla ələ keçirmə və ya onu zorla saxlama, dövlətin konstitusiya quruluşunu zorla dəyişdirmə” adlanır.
Bu maddənin birinci bəndi, yəni 278.1-ci maddə konstitusiyaya zidd olaraq hakimiyyətin zorla ələ keçirilməsinə, yaxud hakimiyyətin zorla saxlanılmasına, habelə dövlətin konstitusiya quruluşunun zorla dəyişdirilməsinə yönələn hərəkətlər haqqındadır.
278.1-ci maddədə göstərilən hərəkətlər 12 ildən 20 ilədək müddətə azadlıqdan məhrum etmə və ya ömürlük azadlıqdan məhrum etmə ilə cəzalandırılır.
Medianews.az
