İşğaldan azad edilən rayonlara avtobus marşrutları açılacağı haqda anonsu və İTV-də yayılan reklam rolikini görüb sevindik. Necə olacaq, hansı təşkilati işlər görülüb (təhlükəsizlik, səfər edənlərin yerləşməsi, bilet satışı və sairə) – bu haqda hələlik hər hansı məlumatımız yoxdur. Ümid eləyək, hər şey yaxşı olsun. Üstəlik, böyük komfort-filan ummuruq. Xalq o torpaqların həsrətini o qədər çəkib ki, gedib quru daşın üstündə yatmağa hazırdır. Elə döyüş əməliyyatları zamanı qısa fasilələrdə yağışın altında, torpaq səngərdə yatıb-dincələn əsgərlərimiz bunu sübut ediblər. Sadəcə, vəzifəli şəxslərdən bir xahiş edərdim: nə olar, mümkünsə bu səfərlər Bakı Beynəlxalq Avtovağzalı (BBA) adlı biabırçılıqdan başlamasın. Çünki İTV-nin hazırladığı reklam rolikindən mən belə başa düşdüm ki, işğaldan azad edilən rayonlara avtobuslar oradan çıxacaq.
Başa düşürəm, alternativimiz yoxdur, rayonlara çıxan avtobusların hamısı oradan gedir. Ancaq kim o ərazidə olubsa, beynəlxalq avtovağzalın nə qədər bərbad məkan olduğunu yaxşı bilir. Əcaib bir tikilidir. Yerin altında istifadəsiz dükanların labirinti, qaranlıq, qorxunc zirzəmilər, sınıq qapılı, salxaq oturacaqlı gözləmə salonları, it iyi verən kassalar, ipdən qırılmış kimi mühafizəçilər sistemi… Bakı Beynəlxalq Avtovağzalının problemləri saymaqla bitmir. O qədər pis planlaşdırılıb, proje edilib ki, bu əraziyə bir girən sevinir, bir çıxan. Çünki avtovağzalın giriş-çıxışları olduqca uyğunsuz düzəldilib. Hər yerdə dəmir barmaqlıqlar, maneələr, dərin uçurumlar var. Nəqliyyat mərkəzindən çox islah əmək düşərgəsinə, yarımqapalı zindana oxşayır. Sanki keçmiş nəqliyyat naziri Ziya Məmmədov bu avtovağzalı tikərkən xalqımıza nifrətinin bütün detallarını üzə çıxarıbdır. Neçə yüz milyon dolları orada faktiki havaya sovurublar, daha dəqiqi, yerə batırıblar, lakin buna görə cavabdehlik daşıyan olmayıbdır.
Uzun sözün qısası, azad edilən torpaqlara qeyri-azad məkandan yollanmaq təəssüratın, əhvalın elə ilk andan korlanması deməkdir. Lütfən, buna yol verməyin. Hətta biz razıyıq gedək Lökbatan, Ələt tərəflərdə çölün düzündə o avtobuslara minək. Təki BBA-nın üzünü görməyək. İndi söz əlaqədar təşkilatlarındır.
Az qala unutmuşdum, bu marşrutlara bilet satışını çaşıb Bakı Nəqliyyat Agentliyi tipli qurumlara tapşırmaq olmaz. Çünki bu halda əlində boş kart, pul yükləməyə qurğu axtara-axtara avara qala bilərsən. Yenə Bakıda kimdənsə xahiş eləyib onun kartıyla avtobusa minirlər, işğaldan azad edilən ərazidə lap biabır olarıq. Gördün kimsə rus sülhməramlıdan “məni avtobusa keçirt” xahişi eləyir… Şişirtmədirmi? Deyil. Keçən günlərdə İrəvan-İstanbul hava reysinin açılacağını eşidən bir deputatımız “Mən AZAL-ın baha biletlərinə etiraz edirəm, qoy ermənilər İstanbula uçaq reysi açsın, İrəvana gedib Türkiyəyə oradan uçacağam” söyləmədimi? (Deyəsən, deputatı bu tip tənqidi çıxışlarına görə artıq sıxma-boğmaya salırlar. Əks halda, dünən onun polisdə işləyən oğluna töhmət verilməsi şayiəsi yayılmazdı. Bizdə belə söhbətlər havadan yaranmır. Uşaqlar bizim gələcəyimiz olduğu üçün hamını uşağından vururuq. Bu, bizdə artıq bir növ milli dəyərə çevrilməkdədir).
Nəhayət, çalışmaq lazımdır bu marşrutlar da saxta tenderlər, müsabiqələr yolu ilə oliqarxlarımıza, nəqliyyat monopolistlərinə verilsin. Qətiyyən belə işlərdə azadlıq, sərbəstlik vermək olmaz. Bizdə vətəni işğaldan azad edərkən gəncləri toplamaq sərbəstdir, qalanı inhisarda saxlanmalıdır: tikinti, söküntü, yeyinti, nəqliyyat, avtobus və sairə… Qorumağa baxanla yeməyə baxan ayrı olmalıdır. Əks halda, qoruqçu yeyib-yatar, sayıqlığı itirər.