Paris şəhərində çoxlu bulvar var, açığı, mən fransız ədəbiyyatı, rəssamlığı və kinosundan adını çox eşitdiyim bu bulvarların haqqında düşünməmişdim, ilk dəfə bir neçə il qabaq şəhərə yolum düşəndə azca çaşıb qalmışdım. Çünki Paris bulvarları bizim başa düşdüyümüz mənada bulvar deyil. Bu küçələrin bir qırağında nəinki dəniz, bəzilərində heç çay (Sena) da yoxdur. Parisdə adi küçələrə də bulvar deyirlər, özəlliklə şəhərin qədim hissəsində. Bunun mənası nədir, bilmirəm.
Ancaq həşəmətli yapist iqtidarımızın Bakıda damlara süni çardaqlar qayırıb, küçələrə içində qəzetdən başqa hər şey – dana kəlləsindən siqaretə, raket yanacağından boranıya qədər – satılan qəzet köşkləri qoyanda və bunların hamısının dizaynını Parisdəkilərə bənzədəndə anladıq ki, rejimimiz frankomaniya azarına düçar olmuşdur. Bunlar elə sanır ki, Parisdəki bir-iki texniki detalı təkrarlayanda dönüb olurlar Napoleon, Lüdovik, nə bilim, Viktor Hüqonun bacısı qızı və sairə. Hətta Versal sarayının təmirinə kalan pul ayırdılar, pəncərəsi Eyfelə baxan böyük bir ev aldılar. Lakin hələlik ortada nəticə yoxdur, azərbaycanlılar “çörək yerinə tort” yemək istəmir.
Hər halda, Bakının bulvarlaşması istiqamətində gərgin fəaliyyət davam edir, bu məsələ manatın devalvasiyasına-zada da baxmır. İqtidar hər şeydən kəsməyə hazırdır, tək bulvar projelərindən yox. Bir-iki həftə qabaq Böyük Şor gölünün qırağındakı bulvara baxış keçirildi, srağagün isə dövlət başçısı “Ağ şəhər bulvarı” adlandırılan hissəni gəzmişdir.
Təxmini hesablamalara görə, hazırda uca millətimizin azı 3 bulvarı vardır: Dənizkənarı Milli Park tərəfdəki qədim bulvar, Böyük Şor gölünün bulvarı, bir də “Ağ şəhər bulvarı”. Təklif edərdim ki, Xocahəsən gölü, Qanlıgöl, Binəqədi qır gölü ərazilərində, həmçinin, Rəsulzadə qəsəbəsində yağışdan dolan küçələrdə çoxlu yeni bulvarlar salınsın. Xalqın tələbi budur. Bulvar çox olarsa basılmaz vətən! Bir də gördün Biləcəri yolundakı küknarlıq Bulon meşəsinə döndü. Bəlkə Hacı Madər Marat olacaqdır? Bəlkə Artur Rasizadənin köksündə bir Taleyran yatır? Nə biləsən. Olacağa bəzən çarə olmur.
Bizdə bulvarlara yüksək diqqətin əlaməti hər şeydə özünü göstərir. Gənclər bulvarlarda tanış olur, öpüşür, evlənir, vətənə layiq yeni nəsil yetişdirirlər. Azərbaycan Milli Elmlər Akademiyasının Bulvar Şöbəsində ağsaqqal alimlərimiz “Nəcis və mazut qarışığından aromaterapiyada istifadənin əsasları” mövzusunda akademik dissertasiya qayırırlar. Zəhmətkeşlərimiz respublikamızın Bulvarıstan adlandırılmasını irəli sürürlər. Bu, qədim türkcədə “bul, var ol” anlamını verir. Başqa mənbələrə görə respublikanın adını “pul var” kimi də yoza bilərik. Azərbaycanlı sözünü isə bulvarbaycanlı ilə əvəz edərik. Gör necə şirin, dilə yatımlıdır.
Eyni zamanda bulvarlar arasında əlaqələrin, münasibətlərin hazırkı səviyyəsi bizi qətiyyən razı salmır. Bir çox hallarda isə hətta narahat etmək üzrədir. Misal üçün, Böyük Şor bulvarını Dənizkənarı bulvarla birləşdirən hər hansı yeraltı su xətti varmı? Yoxdur. Heç deyəsən yerüstü əlaqələr də yoxdur, ya da çox zəifdir. Bu, bizi çox düşündürür, çünki indiki halda Böyük Şor bulvarında gəzən şəhər sakinləri və şəhərimizin qonaqları Dənizkənarı bulvara birbaşa keçə bilmir. Yaxşı olmazmı bütün bu bulvarlar öz aralarında vahid nöqtədə birləşsin? Təxminən metro xətlərindəki kimi. Bildiyimiz kimi, metroya girsən, hara getsən əvvəl-axır “28 may” stansiyasına gəlib çıxırsan. Bu cür vahid mərkəz bulvarlar arasında da olmalıdır ki, əhalinin fasiləsiz istirahəti təmin edilsin.
İndi söz əlaqədar təşkilatlarındır.