Amerikalı qadın 93 yaşını qeyd edib və uzunömürlülüyün sirlərini bölüşüb.
Medianews.az xəbər verir ki, Nyu-York sakini Sesiliya Qomes, qocalmasına baxmayaraq, aktiv həyatında əsas amillərdən biri kimi müntəzəm lobya istehlakını göstərib.
"Səhhətim demək olar ki, mükəmməldir; özümü 50 yaşında hiss edirəm", - Qomes deyib. Təqaüdçü etiraf edib ki, onun pəhrizinin əsasını tərəvəz və düyü ilə birlikdə lobya təşkil edir.
Düzgün qidalanma ilə yanaşı, qadın fiziki məşqlərə və ictimai fəaliyyətə xüsusi əhəmiyyət verir. Bir neçə onilliklər ərzində Qomes həftənin beş günü idman zalına gedir, bəzən orada bir neçə saat vaxt keçirir, güc məşqlərini kardio ilə birləşdirir. Onun dediyinə görə, o, istəsə, hətta futbol və ya beysbol oynaya bilər.
Qomesin qızı qeyd edib ki, ailəsi və dostları ilə sıx ünsiyyət onun anasının sağlamlığının vacib komponentidir. Bütün ailə hər bazar günü nahar üçün toplanır və iş günləri təqaüdçü kilsə xorunda oxuyur və məşqdən sonra dostları ilə ünsiyyət qurur.
Tibb mütəxəssisləri təsdiqləyirlər ki, sağlamlığa belə kompleks yanaşma həqiqətən də aktiv uzunömürlülüyə kömək edə bilər.
Medianews.az
