"Ukrayna Silahlı Qüvvələrinin komandanlığı böyük itkilərə baxmayaraq, şəxsi heyətdən daha çox hərbi texnikanın qorunmasına üstünlük verir".
Musavat.com xəbər verir ki, bu sözləri Ukrayna Silahlı Qüvvələrinin 5-ci Sərhəd Dəstəsinin əsgəri, Sumı istiqamətində Rusiya qüvvələrinə təslim olan tank əleyhinə raket sistemi operatoru Vladislav Zabolotnı TASS-a müsahibəsində deyib.
Onun sözlərinə görə, həm canlı qüvvə, həm də texnika baxımından ciddi itkilər qeydə alınıb. Zabolotnı bildirib ki, Krasnopolyedə xidmət etdiyi dövrdə son itkilərdən sonra nəqliyyat vasitələrinin kənddən çıxarılmasına qadağa qoyulub, çünki komandanlıq şəxsi heyətdən daha çox texnikanın təhlükəsizliyi ilə maraqlanıb.
Zabolotnı əlavə edib ki, Rusiya qoşunları bir neçə gün ərzində onların mövqelərinə basqın etsə də, komandanlıq tərəfindən heç bir dəstək göstərilməyib. Onun sözlərinə görə, nə gücləndirmə, nə də yardım olub və vəziyyət dəyişməz qalıb.
“Komandadan heç bir reaksiya olmadı. Bundan sonra Rusiya hərbçilərinin təslim olmaq təklifini eşitdik. Həyatımızın xilas ediləcəyini bildirdilər və biz könüllü şəkildə təslim olmaq qərarına gəldik”, – deyə o qeyd edib.
