Böyük Britaniyada 19 yaşlı gənc ana klubda baş verən insident zamanı bir kişini kor edib.
Medianews.az xəbər verir ki, o, səkkiz ay müddətinə azadlıqdan məhrum edilib.
Staffordşir qraflığının Hanli şəhər sakini Ceyd Aston 24 noyabr 2024-cü il gecəsi baş verən hadisəyə görə mühakimə olunub. Məlumata əsasən, Aston sevgilisi ilə birlikdə gecə klubuna gedib.
Klubda onlar başqa bir kişi ilə tanış olub və birlikdə rəqs ediblər. İstintaq materiallarında bildirilir ki, rəqs zamanı həmin şəxs qolunu Astonun belinə dolayıb, lakin onun narahat olduğunu hiss edərək dərhal geri çəkilib. Buna baxmayaraq, baş verənlər gənc qadını qəzəbləndirib və o, vəziyyəti sevgilisinə danışıb.
Cütlük arasında mübahisə yaranıb və təhlükəsizlik əməkdaşları onları klubdan kənarlaşdırıb. Aston klubun qarşısında qalıb və təxminən bir saat sonra həmin şəxslə yenidən qarşılaşdıqda ona hücum edib. Qadın kişinin üzünə üç dəfə yumruq vurub, göz qapağındakı halqa isə sol gözün ciddi şəkildə zədələnməsinə səbəb olub. Nəticədə zərərçəkmiş şəxs sol gözünün görmə qabiliyyətini tam itirib.
Məhkəmədə Aston günahını etiraf edib. Onun vəkili aqressiv davranışın uşaqlıq travmaları və qadına diaqnoz qoyulmuş sərhəd şəxsiyyət pozğunluğu ilə əlaqəli olduğunu bildirib.
Məhkəmənin qərarına əsasən, Ceyd Aston səkkiz ay həbs cəzasına məhkum edilib, əlavə olaraq bir il müddətinə şərti cəza alıb. O, zərərçəkmiş şəxsə 500 funt sterlinq məbləğində kompensasiya ödəməli və 20 günlük reabilitasiya proqramında iştirak etməlidir.
Medianews.az