Türkiyə futbolunun əfsanəvi adı Selim Soydan “Soruyoruz” verilişinin canlı efirində səmimi etiraflar edib.
Musavat.com-un Türkiyə mətbuatına istinadla xəbərinə görə, Soydan keçmişdə qumar oynadığını açıqlayıb və həyat yoldaşı - aktrisa Hülya Koçyiğitin onun üçün ən böyük şans olduğunu deyib.
Selim Soydan həyat yoldaşı haqqında danışarkən göz yaşlarını saxlaya bilməyib:
“Hülya xanımı gördüyüm andan taleyim dəyişdi. O, həyatda ən böyük şansımdır.
Toyumuzdan təxminən bir il keçmişdi. O vaxtlar axşam qəzetləri gecə saat 12-dən sonra çıxardı. Taksimdən alıb evə aparardım. Bir gecə saat 3:30 idi. Qumarxanadan çıxmışdım. Qəzetləri alıb evə gəldim. Qapını açmaq istəyəndə içəridən açıldı. Qarşımda Hülya vardı. “Niyə yatmamısan?” dedim. O isə “Şorbanı bişirmişəm, çay da içərsən, sonra yatarsan” dedi. “Niyə susur, niyə mənə heç nə demir?” deyə düşünürdüm. Yeməyimi yedim, çay içdik, amma yenə sükut vardı. Sonra dedim: “Mən günahkaram, səhv etmişəm, niyə mənə heç nə demirsən?” O zaman mənə sadəcə bir cümlə dedi: “Bir gün gələcək, səhvini anlayacaqsan”. Orada ona dedim: “Yaxşı ki, bu gün mənimlə mübahisə etmədin, yaxşı ki, susdun. Söz verirəm, bundan sonra əlimə kart almayacağam”. 50 ildir ki, əlimə kart almamışam. O, çox haqlı idi”.
Musavat.com
