1998-ci ildə amerikalılar 2025-ci ili necə təcəvvür edirdilər?
Medianews.az bildirir ki, bu sualın aydın cavabı var. Belə ki, 1998-ci ildə iki nüfuzlu sosioloji qurum – Gellap və "USA Today” sorğu mərkəzləri 1055 amerikalı arasında sorğu keçirib. Sorğu zamanı amerikalıların 2025-ci illə bağlı proqnozları öyrənilib. Sorğunun nəticələri bu gün Kornell Universitetinin arxivində saxlanır.
Amerikalıların 27 il əvvəlki proqnozlarından doğrulanları da var, doğrulmayanları da.
Medianews.az qeyd edir ki, düz çıxan proqnozlar bunlardır:
- ABŞ-da qaradərili şəxs prezident seçiləcək
- Eyni cinsli nikahlar qanuniləşəcək və yayılacaq
- Yeni və təhlükəli xəstəlik ortaya çıxacaq
- Kosmosa səyahət adi vətəndaşlar üçün kütləvi olmayacaq
- Yadplanetlilərlə əlaqə qurulmayacaq.
Doğrulmayan proqnozlar:
- ABŞ-ın qadın prezidenti olacaq (respondentlərin təxminən üçdə ikisi bunu gözləyirmiş)
- Xərçəngin tam müalicəsi tapılacaq (respondentlərin yarıdan çoxu belə düşünüb)
- İnsanların 100 il yaşaması adi hala çevriləcək (respondentlərin 61 faizinin gözləntisi belə olub).
1998-ci il sorğusunda respondentlər şəxsi məxfiliyin azalacağı, şəxsi azadlıqların daralacağı, uşaqları düzgün böyütməyin çətinləşəcəyi kimi bədbin, irqlərarası münasibətlərin yaxşılaşacağı, tibbi xidmətin daha əlçatan olacağı kimi nikbin proqnozlar da veriblər.
1998-ci ildə amerikalıların ölkədən məmnunluğu 60 faiz olub. 2025-ci ildə bu rəqəm 24 faizə düşüb.
Toğrul Əli,
Medianews.az