Rusiya Xarkovu işğal edə bilər - Politoloq

Moskva ilə Kiyev arasında gözlənilən danışıqların ikinci raundunun başlanması fonunda Rusiya Ukraynada yeni cəbhə açıb. Xüsusilə Xarkov və Sumı vilayətlərinə hücumlarını genişləndirib. Politoloq Məhəmməd Əsədullazadə Medianews.az-a açıqlamasında deyib ki, bu hücumlarda məqsəd danışıqlarda üstünlük əldə etmək və Qərbi fakt qarşısında qoymaqdır: “ABŞ Prezidenti Donald Trampın Rusiya Prezidenti Vladimir Putin haqqında sərt ifadələr işlətməsinə, sanksiyalarla hədələməsinə baxmayaraq Moskvanın müəyyən şərtlərlə razılaşdığı haqda da mesaj verilir. Rusiya hücumları intensivləşdirərək, ABŞ-ın Ukraynaya da təzyiq etməsinə nail olmağa çalışır. İstanbulda danışıqlar baş tutarsa, yenə nəticəsiz olacaq. Çünki Rusiya cəbhədə üstünlük əldə edib, danışıqlar masasında güzəştsiz mövqe ortaya qoyacaq”. “Rusiya bu gedişlə Xarkovu işğal edə bilər” deyən politoloqun fikrincə, Tramp Putinlə ciddi qarşıdurmaya getmək istəmir, Rusiya Prezidenti də bundan istifadə edərək, Ukraynada işğalı genişləndirir. Nailə Qasımova, Medianews.az