“Yunanıstan gizli şəkildə adalara İsrail istehsalı olan müdafiə sistemi yerləşdirib”

Türkiyə ilə Yunanıstan arasında son dövrdə gərginlik sürətlə artarkən, müdafiə sahəsində Yunanıstandan diqqətçəkən bir addım atıldı.

Medianews.az xəbər verir ki, Yunanıstanın “Kathimerini” qəzetinin xəbərinə görə, Afina son iki ayda adalarda və Türkiyənin Bayraktar SİHA-larına qarşı bəzi mühüm nöqtələrdə İsrail istehsalı olan pilotsuz uçuş aparatları əleyhinə sistemlər yerləşdirib. Xəbərə görə, İsrailin məşhur “Dəmir Qübbə” hava hücumundan müdafiə sisteminə bənzər, lakin Yunanıstanın ehtiyaclarına uyğunlaşdırılmış müdafiə sistemləri bölgədə uçan İHA-ları “kor” edərək, onların uçuş planlarına mane olur.

Xəbərdə bu addımın mətbuata sızmasından Yunanıstan hökumətinin narahat olduğu qeyd edilib.

Xatırladaq ki, Yunanıstan və İsrail son zamanlar hərbi sahədə əməkdaşlığı artırıb. Ötən il iki ölkə arasında 1,68 milyard dollar dəyərində müdafiə sazişi imzalanıb.

Keçən həftə Yunanıstan ABŞ -a 20 F-35 qırıcısı almaq üçün rəsmi müraciət edib. Mütəxəssislər qeyd edirlər ki, Yunanıstan F-35-i alsa və Türkiyə qırıcı təyyarə parkını modernləşdirə bilməsə, Egeydəki hava üstünlüyü Yunanıstana keçə bilər.

Leyla, Medianews.az