Göz həkimləri tərəfindən aparılan son sınaqlar sübut edir ki, həftədə iki dəfə yağlı balıq yemək görmə qabiliyyətini qorumağa kömək edir. Balığın tərkibindəki omeqa-3 yağ turşuları gözün torlu qişasının strukturunu möhkəmləndirir və göz quruluğu sindromunu aradan qaldırır.
Medianews.az Foodinfo.az-a istinadla xəbər verir ki, bu vərdiş yaşlılıqla bağlı görmə itkisini 40 faiz azaldır.
Xüsusilə somon, skumbriya və sardina kimi balıqlar beyin inkişafı üçün də əvəzolunmaz qida mənbəyidir. Balıq zülalı ət zülalına nisbətən daha asan həzm olunur və orqanizmi ağırlaşdırmır. Tərkibindəki D vitamini isə kalsiumun sorulmasını təmin edərək sümükləri və dişləri möhkəmləndirir.
Həkimlər uşaqların rasionunda balıq məhsullarının olmasının vacibliyini xüsusi vurğulayırlar. Bu, uşaqlarda diqqət dağınıqlığını azaldır və öyrənmə qabiliyyətini yüksəldir. Həmçinin balıq yağı ürək ritmini stabil saxlayaraq gənc yaşda yarana biləcək kardiologiya problemlərinin qarşısını alır.
Tədqiqatlar göstərir ki, dəniz məhsulları ilə zəngin qidalanan insanlarda depressiya və təşviş halları daha az müşahidə olunur. Balıq əti maddələr mübadiləsini sürətləndirərək artıq çəkidən qurtulmağa da kömək edir. Təzə və ekoloji təmiz balıq seçmək sağlamlıq faydalarını maksimuma çatdırmaq üçün əsas şərtlərdən biridir.
