Bunlar, ürək xəstəliklərinə səbəb olur

Plastik istehsalında istifadə edilən kimyəvi maddələr ürək-damar xəstəliklərindən yüz minlərlə ölümlə əlaqələndirilə bilər. Medianews.az xəbər verir ki, bu barədə eBioMedicine jurnalında dərc olunan yeni araşdırmada deyilir. NYU Langone Health-in alimləri plastikləri elastik etmək üçün istifadə edilən ftalatlardan biri olan di-(2-etilheksil) ftalat (DEHP) üzərində cəmləşiblər. Bu komponent qida qablaşdırmasında, tibbi avadanlıqlarda və bir çox məişət məhsullarında olur. Əvvəlki tədqiqatlar göstərib ki, DEHP ürək damarlarında xroniki iltihaba səbəb ola bilər, infarkt və insult riskini artırır. 200 ölkədən sağlamlıq və ətraf mühit məlumatlarının təhlili göstərib ki, DEHP-yə məruz qalma 2018-ci ildə 55-64 yaşlı insanlar arasında 368,000-dən çox ürək-damar ölümünə səbəb ola bilər. Ən çox hal Hindistan, Pakistan və Misirdə qeydə alınıb. Ölümlərin ən çox hissəsi Afrika, Şərqi Asiya və Yaxın Şərqdə baş verib. Müəlliflər qeyd edirlər ki, ən çox itkiyə məruz qalan regionların bir çoxunda plastik istehsalında bum yaşanır, lakin eyni zamanda kimyəvi təhlükəsizlik sahəsində qeyri-kafi tənzimləmə ilə üzləşir. Vaxtından əvvəl ölümlərin ümumi iqtisadi dəyəri yüz milyardlarla dollarla qiymətləndirilir. Tədqiqat DEHP və ürək xəstəliyi arasında birbaşa səbəb-nəticə əlaqəsini sübut etməsə də, onun tapıntıları sənayedə və evlərdə, xüsusən də sürətlə inkişaf edən bölgələrdə ftalatların istifadəsi standartlarının nəzərdən keçirilməsinin zəruriliyini vurğulayır. Medianews.az