Azərbaycanda seysmoloji vəziyyət nə yerdədir? - AÇIQLAMA

Hazırda Azərbaycanda seysmoloji aktivlik nə yerdədir? Seysmoloji vəziyyətdə hər hansı narahatlıq doğura biləcək dəyişiklik müşahidə olunurmu? Medianews.az saytı bu suallarla Milli Elmlər Akademiyası nəzdində Respublika Seysmoloji Xidmət Mərkəzinə müraciət edib. Mərkəzin elektron xidmətlər şöbəsinin müdiri Vüsalə Rafiqqızı Medianews.az-a açıqlamasında deyib ki, Azərbaycanda son altı ay ərzində seysmiklik elə də aktiv olmayıb: “Maqnitudası 3 və 3-dən yuxarı 60-dan çox zəlzələ qeydə alınıb ki, bu zəlzələlərin əksəriyyəti zəif və hiss edilməyən olub. Bu günə qədər maqnitudası 4 olan cəmi dörd zəlzələ baş verib. Bunlar da elə güclü zəlzələ olmayıb. Sadəcə zəif hiss edilib. İkinci suala gəlincə, dəfələrlə bildirilib və yenə də qeyd etmək istəyirəm ki, zəlzələnin dəqiq proqnozu yoxdur. Ərazi seysmik bölgədirsə orada vaxtaşırı hiss olunmayan və ya zəif hiss olunan zəlzələlər qeydə alınır. Heç kim birmənalı şəkildə deyə bilməz ki, hansısa tarixdə hansı ərazidə və hansı gücdə zəlzələ olacaq və yaxud da olmayacaq. Bu, Yerin təkində gedən prosesdir və onun dəqiq proqnozu da yoxdur”. Nailə Qasımova, Medianews.az