Media
Son bir neçə ildə şəkər tozunun qiymətində artım müşahidə edilir. Ötən ilin müvafiq dövrü ilə müqayisədə sözügedən məhsul iki dəfəyə yaxın bahalaşıb. Belə ki, ötən yay mağazalarda kiloqramı 80-90 qəpiyə satılan şəkər tozu hazırda 1 manat 40 qəpikdir. Həmçinin topdansatış qiymətində də son bir həftə ərzində artım var. Məsələn, indiyə qədər 50 kiloqramlıq şəkər tozu kisəsinin qiyməti 67 manata satılırdısa, hazırda 75 manata təklif olunur. İndi isə şəkər tozunun qiyməti yenidən bahalaşdı. Bəs görəsən şəkər tozunun bahalaşması nə ilə əlaqədardır?
Mövzu ilə bağlı tanınmış iqtisadçı Pərviz Heydərov Medianews.az-a danışdı. Bİldirdi ki, ölkədə şəkər tozunun qiymətinin artacağı gözlənilirdi:
“Şəkər tozu ən çox ehtiyac duyulan qida məhsullarındandır. Bütövlükdə bu məhsullar üzrə bahalaşma isə artıq, bir ildən çoxdur ki, davam edir. Belə ki, ölkədə qeydə alınan inflyasiya göstəricisinin əsasını məhz qida və ərzaq məhsullarının bahalaşması təşkil edir. Başqa sözlə desəm, təkcə cari ilin yanvar-may aylarında ölkəmizdə inflyasiya 12,6 faiz təşkil edibsə, bunun 80 faiz hissəsindən çoxu məhz qida və ərzaq məhsullarının bahalaşması hesabına baş verib.
Sual olunur niyə? Ona görə ki, sözügedən bahalaşma bütün dünyada müşahidə edilir və bizdə bahalaşmanı yaradan ilk növbədə budur. Çünki bir sıra ən zəruri qida və ərzaq məhsulları üzrə ölkəmiz idxaldan asılı vəziyyətdədir. Kənarda qiyməti artan mal və məhsulun qiymətini isə daxili bazarda sabit saxlamaq mümkün deyil. Buna idxal inflyasiyası deyilir.
Şəkər tozu o məhsullardandır ki, biz, daxili tələbatımızı kənarda gətirməklə təmin edirik. Yəni, bu sahədə yerli istehsal kifayət səviyyədə deyil. Son vaxtlar isə bu növ məhsulun qiyməti hər yerdə qalxıb, xüsusən də Rusiya-Ukrayna müharibəsi sözügedən qiymət artımına daha çox təsir edib və edir.
Odur ki, nəzərə almaq lazımdır ki, bu, hələ son olmaya bilər, yəni payızda daha bir qiymət artımına şahidlik etmək ehtimalı mövcuddur. Ümumiyyətlə, bizim şəkər tozu da daxil olmaqla, bir sıra zəruri ərzaq məhsulları üzrə bilavasitə Ukrayna ilə çox sıx əlaqələrimiz var idi. İndi biz, bu kanalı faktiki olaraq itirmişik. Təkcə bu fakt qiymətlərə təsir baxımından sözünü hələ deyəcək”.
Medianews.az
