Rusiya Federasiyası Prezidentinin mətbuat katibi Dmitri Peskov xəbərdarlıq edib ki, şəxsi sanksiyalar Rusiyaya dost olmayan ölkələrin liderlərini təhdid edir.
Bu barədə Kremlin sözçüsü jurnalistlərin Moskva tərəfindən digər dövlətlərin liderlərinə qarşı sanksiyaların, o cümlədən şəxsi sanksiyaların elan edilib-edilməyəcəyi ilə bağlı suallarını cavablandırarkən deyib.
“Əlbəttə, bu, gözlənilə bilər və gözlənilməlidir” – Peskov bildirib.
O qeyd edib ki, Rusiya Federasiyasının sanksiyalar tətbiq etdiyi ABŞ nümayəndələrinin şəxsi siyahısı Vladimir Putinlə razılaşdırılıb.
“Əlbəttə, bu, dövlət başçısı ilə razılaşdırılıb”, – Kremlin sözçüsü bildirib.
Xatırladaq ki, Rusiya Xarici İşlər Nazirliyi bir sıra ABŞ rəsmilərinə qarşı sanksiyaların tətbiq edildiyini açıqlayıb. Moskva Vaşinqtonun oxşar tədbirlərinə cavab olaraq ABŞ Prezidenti Co Bayden və daha 12 Amerika rəsmisinin Rusiya Federasiyasına girişini qadağan edib. Siyahıya ABŞ dövlət katibi Entoni Blinken, müdafiə naziri Lloyd Ostin, ABŞ Silahlı Qüvvələrinin Birləşmiş Qərargah Rəisləri Komitəsinin sədri Mark Milli, Mərkəzi Kəşfiyyat İdarəsinin direktoru Uilyam Börns, ABŞ prezidentinin milli təhlükəsizlik müşaviri Ceyk Sallivan, Ağ Ev mətbuat xidməti, ABŞ Dövlət Departamentinin nümayəndəsi Cen Psaki və başqaları daxildir.