Bu gün İsveçrənin Nion şəhərində UEFA Çempionlar Liqası və Avropa Liqasının püşkü atılacaq. ANS PRESS-in məlumatına görə, püşkatma mərasimi Bakı vaxtı ilə saat 15.00-da başlayacaq.
Çempionlar Liqası: Kuboka “Qalatasaray” və daha yeddi klub iddia edir
Çempionlar Liqasının ¼ final mərhələsinin püşkatmasının nəticələrini beş ölkənin səkkiz klubu (“Barselona”, “Real”, “Malaqa” (İspaniya), “Bavariya”, “Borrusiya” (Almaniya), “Qalatasaray” (Türkiyə), “Yuventus” (İtaliya), “Pari Sen-Jermen” (Fransa)) səbirsizliklə gözləyir. Bu mərhələnin debütantı çərşənbə günü “Porto”nu turnirdən kənarlaşdıran “Malaqa”dır. İspaniya güclülərin “səkkizliy”ində üç komanda ilə təmsil olunur. Sonuncu dəfə bir ölkənin üç komandası ¼ finala 2010-2011-ci il mövsümündə çıxmışdı. O vaxt üç İngiltərə klubu 1/8 final mərhələsində uğur qazanmışdı.
¼ final mərhələsində eyni ölkədən olan komandalar qarşılaşa bilərlər. Yəni, Çempionlar Liqasında da “Barselona”-“Real” qarşıdurmasının şihidi olmağımız mümkündür. Yarımfinala vəsiqə uğrunda ilk oyundar aprelin 2-3-ündə, cavab oyunları isə bir həftə sonra keçiriləcək. Yarımfinalın püşkü aprelin 12-də atılacaq. Bu mərhələnin ilk oyunları aprelin 23-24-ünə, cavab qarşılaşmaları isə bir həftə sonraya təyin edilib. Avropanın ən nüfuzlu klub turnirinin finalı mayın 25-də Londonun “Uembli” arenasında keçiriləcək.
Azərbaycanda da milyonlarla azarkeşi olan “Qalatasaray” sonuncu dəfə Çempionlar Liqasının ¼ final mərhələsində 2000-2001-ci il mövsümündə iştirak edib və iki oyunun nəticəsinə görə “Real”a 3:5 hesabı ilə məğlub olub. Türkiyə klubunun ¼ final mərhələsinədək göstəricilərini və hazırkı rəqibləri ilə oyunlarının statistikasını təqdim edirik:
Bu mövsümdəki oyunlarının statistikası: qələbə-4, heç-heçə 2, məğlubiyyət-2, vurulan qollar-11, buraxılan qollar-9. Bombardir: Burak Yılmaz (8 qol).
Rəqiblərlə qarşılaşmalar:
“Real”: Q2 H0 M1 VQ5 BQ6
“Yuventus”: Q1 H2 M1 VQ6 BQ5
“Barselona”: Q1 H2 M5 VQ6 BQ14
“Borussiya”: Q1 H1 M2 VQ3 BQ5
PSJ: Q2 H0 M2 VQ5 BQ8
“Bavariya”: Q0 H1 M1 VQ1 BQ7
“Malaqa”: qarşılaşmayıb.
Avropa Liqası: “Fənərbağça”nın mümkün rəqibləri
UEFA Çempionlar Liqasının püşkatma mərasimi bitdikdən dərhal sonra - Bakı vaxtı ilə saat 15.40-da Avropa Liqasının püşkü atılacaq. Azərbaycanda da böyük azarkeş ordusu olan “Fənərbağça”nın mümün rəqibləri bunlardır: “Bazel” (İsveçrə), “Rubin” (Rusiya), “Tottenhem” (İngiltərə), “Benfika” (Portuqaliya), “Nyukasl” (İngiltərə), “Latsio” (İtaliya), “Çelsi” (İngiltərə).
¼ finalda eyni ölkələrdən olan klublar bir-birilərinə rəqib ola bilərlər. Yəni, İngiltərə klubları arasında qarşılaşmanı Avropa Liqasında da izləyəmiz mümkündür. İlk qarşılaşmalar aprelin 4-də, cavab oyunları isə bir həftə sonra keçiriləcək. Avropa Liqasının final oyunu mayın 15-də “Amsterdam Arena”da baş tutacaq.