Bir çox insan artıq çəkidən qurtulmaq və özünü daha yüngül hiss etmək istəyir.
Foodinfo.az xəbər verir ki, dietoloq və terapevt Nataliya Pavlyuk bu məqsədə çatmaq üçün Aralıq dənizi və DASH pəhrizlərinin ən effektiv üsullar arasında olduğunu bildirib.
Mütəxəssisin sözlərinə görə, arıqlamağın əsas prinsipi orqanizmdə kalori defisiti yaratmaqdır. Yəni gündəlik qida qəbulu sərf edilən enerjidən az olmalıdır. Pavlyuk qeyd edib ki, qadınlar üçün gündəlik 1300–1500, kişilər üçün isə 1800–2000 kalori aralığı ideal hesab olunur.
Həkim vurğulayıb ki, qısamüddətli dietalarla deyil, düzgün və balanslı qidalanma ilə çəki itirmək həm daha sağlam, həm də uzunmüddətli nəticə verir. Aralıq dənizi və DASH pəhrizləri bu baxımdan üstün sayılır, çünki hər gün 300–500 qram təzə meyvə və tərəvəz qəbulunu, eləcə də tam taxıllı və süd məhsullarının istifadəsini nəzərdə tutur.
Pavlyuk əlavə edib ki, bu pəhrizlər orqanizmi zəruri vitamin və minerallarla təmin edir, eyni zamanda metabolizmi sürətləndirərək yağ yandırılmasını aktivləşdirir.
Digər dietoloq, qidalanma mütəxəssisi Yekaterina Quzman isə arıqlamaq istəyənlərə menyuya balqabaq şorbasını əlavə etməyi tövsiyə edib. Onun sözlərinə görə, bu yemək həm azkalorilidir, həm də bağırsaq fəaliyyətini tənzimləyir.
“Balqabaqdakı lif orqanizmdə yumşaq ‘fırça’ kimi işləyir və həzm sistemini təmizləyir. 100 qram balqabaq şorbasında cəmi 25–35 kalori var – bu, kalori sayanlar üçün əsl hədiyyədir,” – deyə mütəxəssis bildirib.
Quzman həmçinin vurğulayıb ki, balqabaq ürək sağlamlığı üçün də faydalıdır, çünki onun tərkibindəki kalium təzyiqi normallaşdırır və damar gərginliyini azaldır.
