Nyu-York şəhərinin yeni seçilmiş meri, 34 yaşlı Zöhran Məmdani tarixi qələbə qazanaraq şəhərin ilk müsəlman və Cənubi Asiyalı meri olub.
Medianews.az xəbər verir ki, onun həyat yoldaşı, 28 yaşlı Rama Duvaci isə şəhərin tarixində ən gənc birinci xanım kimi diqqət mərkəzinə düşüb.
Texas ştatının Hyuston şəhərində anadan olan Rama Duvaci suriyalı müsəlman ailəsində böyüyüb. Uşaqlıq illərini Dubayda və Qətərdə keçirən Duvaci sonradan təhsilini ABŞ-da davam etdirib. O, Virciniya Birlik Universitetinin məzunu, Nyu-York Vizual Sənətlər Məktəbində isə illüstrasiya üzrə magistr dərəcəsi alıb.
Rəssam və illüstrator kimi fəaliyyət göstərən Duvaci əsərlərində Yaxın Şərq mövzularını, qadınlıq və icma kimliyini araşdırır. Onun işləri BBC News, The New York Times, The Washington Post, Vice və Tate Modern kimi nüfuzlu media və incəsənət platformalarında yer alıb.
Cütlük üç ay əvvəl evlənib. Onlar Hinge adlı tanışlıq tətbiqində bir-birini tanıyıblar. Məmdani bu barədə zarafatla deyib: “Deməli, bu tətbiqlərdə hələ də ümid var”.
Seçkilərdə qələbədən sonra Zöhran Məmdani çıxışı zamanı həyat yoldaşına təşəkkür edərək bildirib: “Mənim inanılmaz həyat yoldaşım Rama – həyatım! Bu an yanımda olmasını istədiyim yeganə insandır.”
CNN-in məlumatına görə, Rama Duvaci seçki kampaniyasında ictimaiyyət qarşısına az çıxsa da, dizayn və rəng seçimi kimi pərdəarxası detallarda mühüm rol oynayıb. Məmdaninin kampaniyasının sarı-narıncı-mavi rəng tonlarında olan loqosu və vizual konsepti Duvacinin yaradıcılığı ilə hazırlanıb.
Məmdani həyat yoldaşını “gizlətmək” ittihamlarına cavab olaraq bildirib: “Mənim fikirlərimi tənqid edə bilərsiniz, amma ailəmi bu siyasi mübarizələrə qatmayın”.
Duvaci öz sənətində və ictimai çıxışlarında Yaxın Şərqdəki siyasi hadisələrə, xüsusilə Fələstin və Suriyada insan haqları məsələlərinə toxunur.
Onun bəzi əsərləri 2022-ci ildə BBC-nin “Nənəmi kim öldürdü?” adlı sənədli filmində də nümayiş olunub.
Zöhran Məmdaninin qalibiyyəti ilə Rama Duvaci yalnız Nyu-Yorkun deyil, həm də ABŞ siyasətinin simvolik fiqurlarından birinə çevrilib. Gənc sənətkarın incəsənət və ictimai fəallığı, ərinin siyasi baxışları ilə birlikdə “müsəlman və müasir Amerika ailəsinin yeni üzü” kimi dəyərləndirilir.
Medianews.az
