Neftin ucuzlaşması bu iki rejimi çökdürəcək - Politoloq

Amerikada yerləşən Müharibə Tədqiqi İnstitutunun (ISW) Rusiya üzrə aparıcı eksperti Corc Barrosun hesablamalarına görə, Rusiya ordusunun itkilərinin miqyasında kəskin azalma olmasa, Ukraynaya qarşı müharibəni ən yaxşı halda 12-16 ay davam etdirə biləcək. Məsələni Medianews.az-a şərh edən politoloq Xaqani Cəfərli bildirib ki, əslində dünya birjalarında neftin qiymətinin kəskin ucuzlaşması həmin müddəti daha da qısaldacaq: “Analitiklərinin hesablamalarına görə, neftin qiyməti 50 dollar olsa, Rusiya büdcəsi 1.9 trilyon rubl, neftin qiyməti 45 dollara düşərsə, 3 trilyon rubl itirəcək. Başqa bir məlumata görə, Ukraynaya qarşı müharibədə Rusiya ordusu Şimali Koreyadan aldığı artilleriya sursatlarından hədsiz dərəcədə asılı vəziyyətə düşüb. Orta hesabla, Rusiya ordusunun artilleriya sursatına tələbatının yarısını Şimali Koreya təmin edir. Bəzi hərbi birləşmələrin isə Şimali Koreya sursatından asılılığı yüz faizə çatıb”. X.Cəfərlinin fikrincə, neftin ucuzlaşması İrandakı rejimin də sonu olacaq: “Molla rejimi neftdən gələn gəlirlər olmadan nəhəng cəza aparatının işləkliyini təmin edə bilməz. Neft gəlirlərinin kəskin azalması sosial partlayışı da qaçılmaz edəcək. Tehranın nüvə proqramı ilə bağlı qısa zamanda anlaşma əldə olunmasa, İrana qarşı ABŞ-İsrail birgə əməliyyatı da gerçəkləşə bilər. İstənilən halda bölgəmiz çox böyük dəyişikliklər mərhələsinə qədəm qoyub”. Toğrul Əli,  Medianews.az