Azərbaycanda yeni kriptobirja işə başlayıb

Binance-dan sonra Azərbaycanın rəqəmsal maliyyə bazarına daha bir kriptobirja – Bitget daxil olub. Martın 6-da Bakıda Bitget-in təqdimatı keçirilib. Məsələ ilə bağlı Medianews.az-a açıqlamasında Osman Gündüz deyib ki, Bitget dünyanın aparıcı kripto platformalarından biridir, onun Azərbaycanın rəqəmsal maliyyə bazarına daxil olması ölkəmizdə bu sektorun inkişafına ciddi təkan verəcək: “Bu gün təşkil olunan təqdimatdan da görünürdü ki, yetərincə böyük kriptobirjadır. Dövriyyə milyardlarladır. Düşünürəm ki, Bitget ölkəmizdə treyderlər və investorlar üçün yeni ticarət imkanları yaradacaq. Binance-dan sonra Azərbaycan bazarına Bitget-in də daxil olması sektorda rəqabətli mühitin də inkişafına dəstək olacaq. Yeni iş yerlərinin açılmasına şərait yaradacaq”. O.Gündüzün fikrincə, Mərkəzi Bank bu sahəyə daha yumşaq münasibət sərgiləyəndən ölkəmizdə kripto bazarında canlanma müşahidə edilir: “Bir müddət öncə Mərkəzi Bankın dəstəyilə SandBox çərçivəsində ölkənin ilk koini - PortCoin kriptovalyutası yaradılıb. Bitget yerli bazarın inkişafına, universitetlərlə əməkdaşğın gücləndirilməsinə, startap ekosistemə, blockchain və kripto sahəsinin inkişafına yönəlik tədbirlərə dəstək göstəriləcəyini açıqlayıb”. Bitget-in əməliyyatlar üzrə direktoru Vüqar Usi Zadədir. O.Gündüz qeyd edib ki, Bitget platformasının Azərbaycan dilinə tərcüməsi, platformada Azərbaycan dilində öyrədici materialların yerləşdirilməsi yaxşı olardı. Toğrul Əli, Medianews.az