UEFA-nın klub turnirlərinin 2025-2026 mövsümündə liqa mərhələləri oynanır. Çempionlar Liqası və Avropa Liqasında 8 turun 2-si, Konfrans Liqasında 6 turun 1-i geridə qalıb.
Hər üç turnirin liqa mərhələsində 36 komanda yarışır. İlk 8 pilləni tutanlar birbaşa 1/8 finala çıxacaq, 9-24-cü yerləri tutanlar 1/16 finaldan keçməli olacaq.
Azərbaycan təmsilçisi “Qarabağ” Çempionlar Liqasının liqa mərhələsində 6 xalla 6-cı yerdədir.
Medianews.az bildirir ki, hazırda klub reytinqinə İngiltərə başçılıq edir. İlk beşlikdə İtaliya, İspaniya, Almaniya və Fransa da var.
Azərbaycan 55 UEFA üzvü arasında 25-cidir. Türkiyə 9-cu, Ukrayna 28-ci, Rusiya 30-cu, Moldova 33-cü, Qazaxıstan 34-cü, Ermənistan 35-ci, Latviya 36-cı, Estoniya 43-cü, Litva 45-ci, Belarus 48-ci, Gürcüstan 52-ci pillədədir.
Reytinq klub turnirlərinin son beş mövsümündə qazanılan əmsallara əsaslanır. Təsnifat mərhələlərində qələbə 1 xal, heç-heçə yarım xal, sonrakı raundlarda qələbə 2 xal, heç-heçə 1 xaldır.
Çempionlar Liqasının liqa mərhələsinə düşən komandalar 6 bonus xalı alır, həmin raundda ilk 8 pilləni tutan komandalara 6 bonus xalı, 9-16-cı yerləri tutan komandalara 4 bonus xalı, 17-24-cü yerləri tutan komandalara 2 bonus xalı verilir, 1/8 finaldan başlayaraq hər mərhələ 1,5 bonus xalı qazandırır.
Avropa Liqasının liqa mərhələsində ilk 8 pilləni tutan komandalar 6 bonus xalı, 9-16-cı yerləri tutan komandalar 4 bonus xalı, 17-24-cü yerləri tutan komandalar 2 bonus xalı alır, 1/8 finaldan başlayaraq hər mərhələ 1 bonus xalı gətirir.
Konfrans Liqasının liqa mərhələsində ilk 8 pilləni tutan komandalar üçün 4 bonus xalı, 9-16-cı yerləri tutan komandalar üçün 2 bonus xalı, 17-24-cü yerləri tutan komandalar üçün 1 bonus xalı nəzərdə tutulur, 1/8 finaldan başlayaraq hər mərhələ 0,5 bonus xalına bərabər olur.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır. Azərbaycan bu mövsüm 4,875 əmsal əldə edib.
Toğrul Əli,
Medianews.az
