“Əli Əkbər Vilayəti Azərbaycana qarşı informasiya müharibəsi başladıb” - Politoloq

“İranın ali rəhbərinin beynəlxalq məsələlər üzrə müşaviri, keçmiş xarici işlər naziri Əli Əkbər Vilayəti son günlər Zəngəzur dəhlizinə görə Azərbaycana qarşı informasiya müharibəsi başladıb”. Politoloq Xaqani Cəfərli Medianews.az-a açıqlamasında belə deyib. O bildirib ki, Vilayəti Azərbaycanın əsas hissəsini Naxçıvanla birləşdirəcək Zəngəzur dəhlizini İranın Qafqazla əlaqələrini kəsməyə, İran və Rusiyanın blokadaya alınmasına xidmət etdiyini bəyan edir: “Vilayəti İranın Cənubi Qafqazın ən böyük ölkəsi olan Azərbaycanla 689 km-lik sərhədinin mövcudluğunu görməzdən gələrək, Ermənistanla 44 km-lik sərhədi “həyat yolu” kimi təqdim etməyə çalışır. Ermənistanın ərazisindən, İranla sərhədə paralel keçən 44 km-lik Zəngəzur dəhlizinin Rusiyanı blokadaya alacağı iddiası Vilayətinin bəd niyyətindən xəbər verir. Vilayətinin bəd niyyətinin digər sübutu Zəngəzur dəhlizi ilə ABŞ-ın Ukraynadakı münaqişəni Qafqazda eskalasiya ilə “əvəz etməyə” çalışması kimi dəyərləndirməsidir. Əli Əkbər Vilayətinin Rusiyanı Azərbaycana qarşı təxribatlara körükləməyə çalışdığı çox aydın görünür. Ancaq Vilayəti anlamır ki, Ukrayna Rusiya imperiyasının dişlərini elə qırıb ki, daha başqalarını dişləyə bilmir”. Nailə Qasımova, Medianews.az