Qurbanı kim seçir: dələduz, yoxsa özümüz?

“Bu gün ölkəmizdə baş verən kiberdələduzluqların əsas iştirakçıları, bəzən özləri də fərqinə varmadan, elə qurbanların özləridir”. Azərbaycan İnformasiya və Kommunikasiya Texnologiyaları Sənayesi Assosiasiyasının sədri Elvin Abbasov son vaxtlar bank kartlarından pul oğurluqlarının artmasıı hallarını Medianews.az-a şərh edərkən belə deyib. Ekspert bildirib: “Biz dələduzlara məlumatlarımızı öz əlimizlə təqdim etməsək, yalan vədlərə aldanmasaq, heç vaxt qurbana çevrilmərik. Çox vaxt başımıza gələnlərin əsas səbəbi elə özümüzük. Maariflənək. Çünki rəqəmsal dünya artıq həyatımızın ayrılmaz bir parçasına çevrilib. Bu məkanda təhlükəsiz yaşamağın yolu isə ilk növbədə fərdi bilik, texnoloji ayıqlıq və davamlı məlumatlanmadan keçir”. E.Abbasov vurğulayıb ki, məsələ bilməmək deyil, bilmədiyini bilməməkdir: “Təhlükə kənarda deyil, içimizdədir. Bəlkə də biz dələduzun deyil, öz zəifliyimizin qurbanıyıq. Maariflənməsək, əsl təhlükə elə bizik”. Nailə Qasımova, Medianews.az